महादेव गित्ते याला दुसऱ्या जेलमध्ये नेण्यासाठी बीड कारागृहातून बाहेर आणलं तेव्हा महादेव गित्ते याने माध्यमांच्या कॅमेऱ्यासमोर प्रतिक्रिया देण्याचा प्रयत्न केला. वाल्मिकच्या सांगण्यावरुन आम्हाला मारहाण झाली, असं महादेव गित्ते म्हणाला. महादेव गित्ते याच्यासह इतर तीनही आरोपीदेखील आपल्याला मारहाण झाल्याचं सांगताना दिसले. वाल्मिक कराडच्या सांगण्यावरुन आम्हाला मारहाण झाली. तुम्ही कारागृहातील सीसीटीव्ही चेक करा, असं महादेव गित्ते आणि इतर आरोपी व्हिडीओत म्हणताना दिसले. यानंतर पोलिसांनी महादेव गित्तेला तातडीने पोलीस व्हॅनमध्ये बसवत छत्रपती संभाजीनगरच्या हर्सुल कारागृहाकडे नेलं.

महादेव गित्ते याच्या आरोपांनंतर कारागृह अधिक्षकांकडून कारागृहातील सीसीटीव्ही फुटेज जारी केले जातात का? ते पाहणं महत्त्वाचं आहे. महादेव गित्तेने केलेले आरोप गंभीर आहेत. वाल्मिक कराडच्या सांगण्यावरुन आपल्याला मारहाण केल्याचा दावा इतर चार आरोपींकडून करण्यात आला आहे. तर भाजप आमदार सुरेश धस यांनी वाल्मिक कराडला महादेव गित्ते आणि अक्षय आठवलेकडून मारहाण झाल्याचा दावा केला होता.

महादेव गित्ते कोण आहे?

आरोपी महादेव गित्ते हा राष्ट्रवादी शरदचंद्र पवार पक्षाचे नेते बबन गित्ते यांचा निकटवर्तीय आहे. बबन गित्तेंसोबत काम करताना महादेव गित्ते याच्यावर त्यांच्या विविध कार्यक्रमाच्या नियोजनाची जबाबदारी असायची. सर्व कार्यकर्त्यांशी संपर्क, संघटन वाढवणं, तसेच इतर सर्व नियोजनाचं काम महादेव गित्ते करायचा. महादेव गित्ते हा बापू आंधळे हत्या प्रकरणात जेलमध्ये आहे. महादेव गित्तेच्या घरावर जून 2023 मध्ये गोळीबार झाला होता. हा गोळीबार वाल्मिक कराडच्या सांगण्यावरुनच झाल्याचा आरोप महादेव गित्तेने केला होता.