गुढीपाडवा, अक्षय्यतृतीया, दिवाळी या महत्त्वाच्या सणांच्या दिवशी वाहनखरेदीला नागरिकांकडून प्राधान्य दिले जाते. त्यासाठी सणाच्या काही दिवस अगोदर वाहनांची नोंदणी करून सणाच्या दिवशी वाहन घरी आणले जाते. या वर्षीदेखील गुढी पाडव्याला वाहनखरेदी करणाऱ्यांचे प्रमाण वाढले आहे. त्यासाठी गेल्या काही दिवसांपासून वाहननोंदणी सुरू होती. त्यामुळे गेल्या वर्षीच्या तुलनेत यंदा दुचाकी, कारसह सर्वच वाहन खरेदीत वाढ झाली आहे.

गेल्या वर्षी पाडव्याच्या मुहुर्तावर सात हजार ३०० वाहनांची खरेदी केली होती. या वर्षी हा आकडा १० हजारांच्या पुढे गेल्याचे दिसून येत आहे. सन २०२४मध्ये गुढीपाडव्याला सहा हजार २२१ मोटारसायकल खरेदीच्या नोंदी झाल्या होत्या, तर यंदा २०२५मध्ये सहा हजार ५१० नवीन नोंदी झाल्या आहेत. त्यामुळे गेल्या वर्षीपेक्षा यंदा दोन हजारांपेक्षा जास्त दुचाकींची खरेदी वाढली आहे.

‘गुड्स’मध्ये दुपटीने वाढ

गत वर्षी २,३२६, तर यंदा २,४२४ कारच्या नोंदी झाल्या. त्यापाठोपाठ रिक्षा खरेदीत वाढ झाली. मालवाहतूक करणाऱ्या वाहनांत दुपटीने वाढ झाली आहे. बस आणि टॅक्सी या वाहनांच्या खरेदीची संख्याही वाढली आहे.

परिवहन कार्यालयातील वाहन नोंदणी

पुणे : ११ हजार ५६
पिंपरी-चिंचवड ६ हजार ६४८
नाशिक : ३ हजार ६२६
मुंबई (मध्य): ३ हजार १५४
ठाणे : ३ हजार

दरम्यान, यंदा २०२५ मध्ये २२ हजार ०८१ चारचाकी वाहनांची नोंदणी करण्यात आली. ही मागील वर्षीच्या तुलनेत ४ हजार ९४२ ने जास्त आहे. याची टक्केवारी २८.८४ टक्के आहे. तसेच मोटरसायकल, स्कूटर या दुचाकी वाहन प्रकारात सन २०२५ मध्ये ५१ हजार ७५६ नवीन वाहनांची खरेदी नागरिकांकडून करण्यात आली आहे. मागील वर्षी हीच खरेदी ४० हजार ६७५ एवढी होती. यामध्येही ११ हजार ०८१ ने वाढ नोंदविण्यात आली असून, २७.१४ टक्के अधिकची नोंदणी झाल्याचे निदर्शनास येत आहे. त्यामुळे आता वाहनांची संख्या जेवढी वाढत आहे त्यानुसार इंधनाची मागणी वाढणार आहे.