MNS NEWS : मनसे अध्यक्ष राज ठाकरे यांची एकीकडे सभा होत असताना पक्षातील धुसफुसीबाबत मोठी बातमी समोर येत आहे. पालघरमध्ये मनसे नेते अविनाश जाधव यांच्या फोटोला काही मनसैनिकांनीच काळं फासलं आहे. त्यामुळे राजकीय वर्तुळात विविध चर्चांना उधाण आलं आहे.
पालघरच्या बोईसर येथील ओसवाल परिसरात हे बॅनर लावण्यात आलं होतं. याच बॅनरवर अविनाश जाधव यांच्या फोटोला काळं फासण्यात आलं आहे. पालघरमधील मनसेच्या पदाधिकाऱ्यांनीच या बॅनरवरील अविनाश जाधवांच्या फोटोला काळं फासल्याची माहिती समोर येत आहे. त्यामुळे मनसेमधील अंतर्गत धुसफूस चव्हाट्यावर आल्याची चर्चा राजकीय वर्तुळात सुरु आहे.
अविनाश जाधव हे गेल्या अनेक वर्षांपासून मनसेचे ठाण्याचे जिल्हाप्रमुख आहेत. मधल्या काळात पक्षाकडून नव्याने सर्व पदाधिकाऱ्यांची नियुक्ती केली जात होती. यावेळी अविनाश जाधव यांनी जिल्हाप्रमुख पदाचा राजीनामा दिला होता. पण राज ठाकरे यांनी पुन्हा अविनाश जाधव यांनाच जिल्हाप्रमुखपदाची संधी दिली. राज ठाकरेंनी पालघरची सुद्धा जबाबदारी अविनाश जाधव यांना दिली होती.
Devendra Fadnavis : ‘माधव नेत्रालय केवळ नागपूर आणि महाराष्ट्रासाठी नाही तर…’; फडणवीसांचे मोठे विधान
पालघरमध्ये मनसेच्या गोटात गेल्या काही महिन्यांमध्ये अनेक घडामोडी घडल्या आहेत. मनसेचे पालघरचे जिल्हाध्यक्ष समीर मोरे यांनी मधल्या काळात मुख्यमंत्री एकनाथ शिंदे यांच्या नेतृत्वातील शिवसेनेत प्रवेश केला होता. पण नंतर त्यांनी मनसे पक्षनेत्यांच्या विनंतीवरुन पुन्हा मनसेत प्रवेश केला होता. दरम्यान, गेल्या काही दिवसांपासून पालघरमध्ये मनसेत अविनाश जाधव यांच्याबद्दल नाराजी पाहायला मिळत होती. या नाराजीने आता टोक गाठलं आहे. थेट बॅनरवर अविनाश जाधव यांच्या बॅनरला काळं फासण्यात आलं आहे. या घटनेवर आता राज ठाकरे काय भाष्य करतात? ते पाहणं महत्त्वाचं आहे.
लेखकाबद्दलचेतन पाटीलचेतन पाटील हे सध्या महाराष्ट्र टाइम्स ऑनलाईन टीममध्ये डिजीटल कंटेंट प्रोड्यूसर म्हणून कार्यरत आहेत. चेतन यांनी याआधी tv9 मराठी, News18 लोकमत, आपलं महानगर येथे काम केलं आहे.… आणखी वाचा