जाती-धर्माच्या चौकटीत अडकलेल्या समाजात कधी कधी अशी एखादी घटना घडते की जी माणुसकीचं सर्वोच्च स्थान अधोरेखित करते. परंपरांच्या चौकटी मोडत, एका ब्राम्हण व्यक्तीच्या अंत्यसंस्काराचा विधी एका मुस्लिम व्यक्तीने पार पाडला. काहीजणांना हे ऐकूण आश्चर्यकारक वाटू शकतं, पण हीच माणुसकीची खरी ओळख आहे. जन्म आणि मृत्यू यांच्या पलीकडे जात, नात्यांचं खरं स्वरूप दाखवणारी ही घटना पुणे शहरातील… रमजान महिन्याच्या पवित्र वातावरणात आणि गुढी पाडव्याच्या सणाच्या पार्श्वभूमीवर, पुणे शहरातून मानवतेचे आणि सामाजिक सलोख्याचे एक हृदयस्पर्शी उदाहरण समोर आलंय… पुण्याच्या मध्यवस्तीतील रास्ता पेठ परिसरात एक वृद्ध बहीण आणि भाऊ एकमेकांच्या आधाराने राहत होते. त्यांचे जवळचे कोणी नातेवाईक नसल्याने ते दोघेच एकमेकांचा आधार होते. दुर्दैवाने, ७० वर्षीय भाऊ सुधीर किंकळे यांचे राहत्या घरी निधन झाले. अचानक आलेल्या या संकटामुळे आणि जवळ मदतीला कोणीच नसल्याने, भावावर अंत्यसंस्कार कसे करावेत, या विचाराने वृद्ध बहीण हवालदिल झाली होती. ही बिकट परिस्थिती मायकल साठे यांच्या निदर्शनास आली. त्यांनी तातडीने उम्मत सामाजिक संस्थेचे अध्यक्ष जावेद खान यांच्याशी संपर्क साधला आणि त्यांना या निराधार बहिणीच्या स्थितीची माहिती दिली. साठे यांनी खान यांना अंत्यविधीसाठी मदत करण्याची विनंती केली. रमजानचा महिना आणि सणासुदीची धांदल सुरू असूनही, जावेद खान यांनी कोणताही विचार न करता, आपली सर्व कामे बाजूला ठेवून मदतीसाठी तात्काळ होकार दिला आणि ते थेट त्या ज्येष्ठ भगिनीच्या मदतीसाठी धावले. या घटनेनंतर त्यांचं सर्वच स्थरातून कौतुक होत असून त्यांना शिवसेना ठाकरे गटाचे नेते उद्धव ठाकरे यांचाही फोन आला.. जावेद खान यांच्याशी थेट बातचित केलीये आमचे प्रतिनिधी आदित्य भवार यांनी…