Naresh Mhaske on Uddhav Thackeray : खासदार नरेश म्हस्के यांनी उद्धव ठाकरे यांच्यावर खोचक शब्दांत टीका केली आहे. उद्धव ठाकरे हे आधुनिक जगातील औरंगजेब आहेत, असा घणाघात नरेश म्हस्के यांनी केला आहे. त्यांच्या या वक्तव्यावरुन शिवसेनेच्या दोन्ही गटातील राजकीय वाद वाढण्याची शक्यता आहे.
नरेश म्हस्के नेमकं काय म्हणाले?
“उद्धव ठाकरे हे आधुनिक जगातले औरंगजेब आहेत. ज्या पद्धतीने औरंगजेबाने आपल्या वडिलांना आणि आपल्या भावांना त्रास दिला. त्याच पद्धतीने उद्धव ठाकरे यांनी शेवटच्या दिवसांत बाळासाहेब ठाकरे यांना त्रास दिला. ते नेहमी राज ठाकरे यांनी व्यक्त केलेलं आहे. त्यांनी आपल्या वडिलांच्या विचारांची प्रॉपर्टी घेतली नाही. तर त्यांनी आपल्या सख्ख्या भावांना प्रॉपर्टी करता त्रास दिला. ते वाद कोर्टापर्यंत गेले”, असं नरेश म्हस्के म्हणाले.
“शेवटच्या दिवसामध्ये त्यांनी बाळासाहेबांच्या विचारांचे जे दुश्मन आहेत, त्यांच्यासोबत हातमिळवणी केली. बाळासाहेबांच्या दुश्मनांसोबत हातमिळवणी? बाळासाहेब गेल्यानंतरही त्यांनी यातना दिलेल्या आहेत. असे हे उद्धव ठाकरे आधुनिक जगातले औरंगजेब आहेत. त्यांनी आपल्या भावांचा सुद्धा संपत्तीसाठी काटा काढला. जे आपल्या भावांचे नाही झाले ते जनतेचे काय होणार आहेत”, असा घणाघात नरेश म्हस्के यांनी केला.
दरम्यान, उद्धव ठाकरे आणि एकनाथ शिंदे यांच्यात सातत्याने वाकयुद्ध रंगलेलं बघायला मिळत आहे. नुकतंच कॉमेडियन कुणाल कामरा याने एकनाथ शिंदे यांच्याबद्दल तयार केलेल्या नव्या गाण्यामुळे दोन्ही शिवसेनेत राजकीय संघर्ष वाढला आहे. याच गाण्यामुळे दोन्ही शिवसेनेकडून एकमेकांवर टोकाची टीका केली जाताना दिसत आहे.
लेखकाबद्दलचेतन पाटीलचेतन पाटील हे सध्या महाराष्ट्र टाइम्स ऑनलाईन टीममध्ये डिजीटल कंटेंट प्रोड्यूसर म्हणून कार्यरत आहेत. चेतन यांनी याआधी tv9 मराठी, News18 लोकमत, आपलं महानगर येथे काम केलं आहे.… आणखी वाचा