बावनकुळे पुढे म्हणाले की, उद्धव ठाकरे यांनी त्यांच्या पक्षाच्या वाढीसाठी प्रयत्न करावेत. “लोकसभेनंतर आम्ही आमचा पक्ष अधिक मजबूत करण्यासाठी काम केले, पण उद्धव ठाकरे यांचा पक्ष दिवसेंदिवस फुटत आहे. अनेक नेते आणि कार्यकर्ते त्यांना सोडून गेले आहेत. त्यामुळे त्यांनी मोदी, शहा, फडणवीस आणि शिंदे यांच्यावर टीका करण्यापेक्षा आपल्या पक्षातील लोक का सोडून जात आहेत, याचा विचार करावा,” असे बावनकुळे यांनी स्पष्ट केले.

आम्ही मुस्लिम विरोधी नाही.
भाजपच्या मायनॉरिटी कमिटीच्या वतीने रमजानच्या निमित्ताने विशेष कार्यक्रमाचे आयोजन करण्यात आले आहे. पंतप्रधान मोदी यांनी संपूर्ण देशवासीयांना रमजान ईदच्या शुभेच्छा दिल्या आहेत. या संदर्भात बोलताना महसूल मंत्री बावनकुळे म्हणाले की, “आम्ही मुस्लिम विरोधी नाही. भाजप अल्पसंख्याक समाजाच्या विकासासाठी कार्यरत आहे. भाजपच्या मुस्लिम मोर्चाच्या माध्यमातून विविध उपक्रम राबवले जात आहेत.”
बावनकुळे यांनी अशा लोकांविरोधात तीव्र भूमिका घेतली आहे, जे भारतात राहून पाकिस्तानचा झेंडा फडकवतात. त्यांनी उद्धव ठाकरे यांच्या नाशिक आणि परभणीतील सभांमध्ये पाकिस्तानचे झेंडे फडकवल्याचा आरोप केला आणि भाजप अशा कृतींना पाठिंबा देत नाही, असे स्पष्ट केले. तसेच, पाकिस्तान क्रिकेट मॅच जिंकल्यानंतर भारतात फटाके फोडणाऱ्या लोकांविरोधात त्यांचा विरोध असल्याचेही ते म्हणाले.

मोदींचा नागपूर दौरा
पंतप्रधान नरेंद्र मोदी ३० मार्च रोजी नागपूर दौऱ्यावर येणार असून, त्यांच्या स्वागतासाठी भाजपकडून मोठी तयारी सुरू आहे. त्यांच्या दौऱ्यात संघ मुख्यालय, दीक्षाभूमी, माधव नेत्रालय आणि डिफेन्सच्या दारुगोळा उत्पादन करणाऱ्या सोलार कंपनीला भेट देणार आहे. नागपूर शहरातील विविध चौकांमध्ये मोदींचे स्वागत करण्याची विशेष व्यवस्था करण्यात आली असल्याची माहिती महसूल मंत्री चंद्रशेखर बावनकुळे यांनी दिली.
पंतप्रधान मोदींच्या दौऱ्याच्या पार्श्वभूमीवर नागपुरात सुरक्षा व्यवस्था वाढवण्यात आली आहे. भाजपच्या कार्यकर्त्यांनी मोदींच्या स्वागतासाठी विशेष नियोजन केले असून, शहरात ठिकठिकाणी होर्डिंग्ज आणि बॅनर्स लावण्यात आले आहेत. भाजपच्या स्थानिक नेत्यांनी सांगितले की, मोदी यांचा हा दौरा विकास प्रकल्पांचा आढावा घेण्यासाठी असून, ते नागपूरमधील महत्त्वाच्या ठिकाणी भेट देऊन तेथील प्रगतीचा आढावा घेतील.