Mumbai Clean Up Marshal : महापालिकेच्या २४ वॉर्डांकडूनही घनकचरा व्यवस्थापन विभागाकडे तक्रारी आल्याने त्यावर विचारविनिमय करून ही सेवा बंद करण्याचे नियोजन महापालिकेने केले आहे.
मुंबई महापालिकेच्या २४ वॉर्डांमध्ये ‘क्लीन अप मार्शल’ची नियुक्ती करण्यात आली. १२ खासगी संस्थांमार्फत हे ‘मार्शल’ नियुक्त केले. ‘क्लीन अप मार्शल’कडून अस्वच्छता पसरवणाऱ्यांविरोधात १०० रुपयांपासून एक हजार रुपयांपर्यंत दंडआकारणी केली जात आहे. मात्र कारवाईच्या नावाखाली लूट, वसुली होत असल्याच्या तक्रारी मुंबई महापालिकेकडे येऊ लागल्या. महापालिकेच्या २४ वॉर्डांकडूनही घनकचरा व्यवस्थापन विभागाकडे तक्रारी आल्याने त्यावर विचारविनिमय करून ही सेवा बंद करण्याचे नियोजन महापालिकेने केले आहे. त्यासंदर्भातील प्रस्ताव आयुक्त गगराणी यांच्याकडे पाठवण्यात आला आहे. ‘क्लीन अप मार्शल’ नियुक्त केलेल्या खासगी संस्थांसोबत महापालिकेचा ४ एप्रिल २०२५पर्यंत करार आहे. हा करार संपुष्टात येत आहे. पुढे तो न वाढवण्याचा निर्णय घेण्यात आला आहे.
एसटीने प्रवास करणाऱ्यांसाठी आनंदाची बातमी! पुण्यातून १५ एप्रिलपासून ‘या’ मार्गांवर धावणार जादा बसेस, असे आहे नियोजन
सध्या घनकचरा व्यवस्थापन विभाग उपविधी कायद्यांतर्गत मुंबईत आकारल्या जाणाऱ्या विविध प्रकारच्या दंडांच्या रकमेत बदल करत आहेत. यामध्ये ‘क्लीन अप मार्शल’कडून आकारल्या जाणाऱ्या दंडाचाही समावेश आहे. त्यामुळे या दंडाच्या रकमेत बदल केल्यास पुढे पुन्हा ‘क्लीन अप मार्शल’ची नियुक्ती करणे उचित ठरेल की नाही, याबाबतही नंतर निर्णय घेतला जाणार आहे, अशी माहिती महापालिकेतील सूत्रांनी दिली.
रुग्णालयातील कारवाईही बंदच
मे २०२४ पासून हीच कारवाई मुंबई महापालिकेच्या रुग्णालयांतही करण्याचा निर्णय घेतला होता. रुग्णालयांत मोठ्या प्रमाणात रुग्ण आणि त्यांचे नातेवाईक येत असतात. त्यांच्याकडून अस्वच्छता पसरवली जाते. म्हणून महापालिकेच्या नायर, शीव, केईएम, कूपर, राजावाडी आणि कांदिवलीतील डॉ. बाबासाहेब आंबेडकर रुग्णालयात ‘क्लीन अप मार्शल’ नियुक्त केले. मात्र कारवाईच्या नावाखाली रुग्णांची लूट होत असल्याने ही सेवा बंद करण्यात आली. 
Ajit Pawar: सोबतीचा फायदा कळलाच असेल, रात्री २ वाजता फॉर्म, अजितदादांनी बनसोडेंच्या उमेदवारीचं गुपितच फोडलं
कंत्राटदारांना दंड
मुंबईत अस्वच्छता पसरवणाऱ्यांविरोधात ‘क्लीन अप मार्शल’कडून दंडात्मक कारवाई केली जात आहे. मात्र याच ‘क्लीन अप मार्शल’चे काम पाहणाऱ्या कंत्राटदारांवर दंडाची कारवाई मुंबई महापालिकेने नुकतीच केली. कर्तव्यात कसूर केल्याप्रकरणी १२पैकी सात खासगी संस्थांकडून ६० लाखांहून अधिक दंड वसूल करण्यात येणार होता. अद्याप हा दंडही संस्थांनी भरलेला नाही.
Azad Maidan Mumbai: सरकारकडून आझाद मैदानासंदर्भात नियमावली जाहीर, आता ‘हे’ नियम पाळावेच लागणार
योजनेच्या मार्गात अडथळे
मुंबईत प्रत्येक विभागात ‘क्लीन अप मार्शल’ नियुक्त करण्याची योजना सन २००७मध्ये सुरू करण्यात आली होती.
सन २०११मध्ये ही सेवा बंद झाली. त्यानंतर पुन्हा सन २०१६मध्ये या योजनेचे पुनरुज्जीवन केले.
करोनाकाळात ही योजना तात्पुरती बंद करण्यात आली. मार्च २०२२मध्ये करोना निर्बंध उठवले. मात्र अनेक तक्रारींमुळे ही योजना बंदच राहिली.त्यानंतर गेल्या वर्षी एप्रिलमध्ये पहिल्या आठवड्यापासून मार्शलकडून अस्वच्छता पसरवणाऱ्यांविरोधात पुन्हा कारवाईला सुरुवात झाली.
११ महिन्यांतील कारवाई
१ लाख ४५ हजार जणांवर बडगा
४ कोटी ५४ लाख रुपयांपेक्षा अधिक दंड वसूल
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाइनमध्ये कन्सल्टंट म्हणून कार्यरत असून पत्रकारितेमध्ये पदव्युत्तर शिक्षण पूर्ण केले आहे. ऑनलाइन माध्यमांमध्ये फ्रीलान्सिंगचा २ वर्षांचा अनुभव आहे आणि आता मटा ऑनलाइनमध्ये आहे. जनरल बातम्यासोबतच गुन्हेगारीविषयक बातम्यांमध्ये रस.… आणखी वाचा