कुणाल कामरानं त्याच्या स्टँड अप शो दरम्यान विडंबन गीत सादर केलं. त्यातून त्यानं उपमुख्यमंत्री एकनाथ शिंदे यांचा अपमान केल्याचा दावा शिवसेना नेत्यांनी केला आहे. शिंदेंवर निशाणा साधण्यामागे कोणता कट होता का, याचा तपास पोलिसांनी सुरु केला आहे. त्यामुळे पोलिसांच्या तपासाची दिशा निश्चित झालेली आहे.

एनडीटीव्हीच्या वृत्तानसार, शिवसेनेचे प्रमुख नेते एकनाथ शिंदे यांची खिल्ली उडवण्यासाठी कोणी पैसे किंवा अन्य प्रकारे काही लाभ मिळाले होते, याचा तपास पोलिसांनी सुरु केला आहे. या प्रकरणामागे कट असल्याची शंका शिवसेनेच्या प्रवक्त्या शायना एनसी यांनी बोलून दाखवली होती.

कुणाल कामरा सध्या तमिळनाडूत असल्याचं सांगितलं जात आहे. त्याचे आई, वडील मुंबईत आहेत. त्यांना व्हॉट्स ऍपवर समन्स पाठवण्यात आलेलं आहे. शिंदेंची टर उडवण्यासाठी कामराला कोणी पैसे दिले होते का, याचा शोध घेण्याचा प्रयत्न पोलीस करत आहेत.

कुणाल कामरानं स्टँड अप कॉमेडी करताना विडंबन गीतं सादर केली. त्यातील एका गाण्यातून त्यानं शिंदेंना लक्ष्य केल्याचा दावा केला जात आहे. ते गाणं लिहिताना कामराला कोणी मदत केली होती का, याचाही शोध सुरु आबे. कुणाल कामराचा मोबाईल आणि त्याच्याकडे असलेल्या अन्य उपकरणांची तपासणी होऊ शकते.