औरंगजेब याची कबर छत्रपती संभाजी नगरच्या खुलताबाद येथे आहे. ही कबर काढून टाकण्यात यावी अशी मागणी महायुतीतील घटक पक्षांसह विविध हिंदुत्ववादी पक्ष संघटनांनी केली आहे. यानंतर बजरंग दल व विश्व हिंदू परिषदेने अल्टिमेटम देत महाराष्ट्रामध्ये आंदोलनं केली. यात नागपूर येथे आंदोलनानंतर रात्री दंगल उसळली. औरंगजेबाची कबर व नागपूर येथे झालेली दंगल या घटनांचे गांभीर्य लक्षात घेत, एनआयएची टीम छत्रपती संभाजीनगर जिल्ह्यात दाखल झाली असल्याची माहिती सूत्राने दिली आहे. या टीमकडून छत्रपती संभाजीनगरसह खुलताबाद येथील हालचालींवर विशेष लक्ष ठेवले जात आहे. त्याचबरोबर मराठवाड्यातील(Marathwada) बीड, नांदेड, परभणी, जालना, उदगीर या जिल्ह्यांमध्ये देखील प्रत्येक हालचालींवर एनआयएची तीन विशेष पथकं लक्ष देत आहेत. तसेच मराठवाड्याला लागून असलेल्या विदर्भात बुलढाणा या जिल्ह्यात देखील या टीमचे विशेष लक्ष आहे.

एनआयएची टीम मराठवाड्यामध्ये विशेष लक्ष देत असताना ज्या जिल्ह्यांना दंगलीची पार्श्वभूमी आहे त्या ठिकाणी संशयित व्यक्तींच्या हालचालींवर लक्ष देत आहे. या परिसरामध्ये तपास यंत्रणांचे कर्मचारी लक्ष ठेवून आहेत. परभणी, जालना, नांदेड या ठिकाणी देखील विशेष पथक गेले असल्याची माहिती सूत्रांनी दिली आहे.
दरम्यान, नागपूरमध्ये हिंसाचाराच्या पार्श्वभूमीवर आज(२१ मार्च) शुक्रवारच्या नमाजानिमित्त शहरात पोलीस अलर्ट मोडवर आहेत. दंगलीनंतर नागपुरात मशिदींबाहेर कडेकोट सुरक्षा व्यवस्था तैनात करण्यात आली आहे. नागपुरात चौकाचौकात पोलिसांचा जागता पहारा पाहायला मिळत आहे. शहरात पुन्हा तणाव होऊ नये यासाठी नागपूर पोलीस सतर्क आहे.