या घटनेबाबत पोलिसांनी सांगितले की, टेंभू येथील टप्पा क्रमांक एक ब धरण परिसरात कराड शहरातील बारावीची परीक्षा झाल्यानंतर एका क्लासमधील सहा विद्यार्थी रंगपंचमी साजरी करून फोटो काढण्यासाठी गेले होते. रंगपंचमी साजरी करून टेंभू धरणाच्या कॅनॉलमध्ये उतरले असता एका युवतीचा पाय घसरून ती कॅनॉलच्या पाण्यात पडली. यावेळी उपस्थित असलेल्या विद्यार्थ्यांनी तिला वाचवण्याचा प्रयत्न केला. मात्र, ती पाण्याचा प्रवाह वेगाने असल्याने ती सापडली नाही. ती पाण्याच्या प्रवाहात वाहून गेली. यावेळी जुहीसह तिचे दोन मित्र पाय घसरून पाण्याच्या पडले होते. त्यावेळी इतर युवकांनी दोघांना वाचवले. मात्र, जुई वाचवण्यात अपयश आले. यावेळी या युवकांनी तिचा शोध घेण्याचा प्रयत्न केला. मात्र, पाण्याचा प्रवाह जास्त असल्यामुळे त्यांना ते शक्य झाले नाही.

या घटनेची माहिती मिळताच घटनास्थळी कराड तालुका पोलीस ठाण्याचे पोलीस निरीक्षक महेंद्र जगताप, सहाय्यक पोलीस निरीक्षक अभिजीत चौधरी, पोलीस उपनिरीक्षक भैरव कांबळे यांच्यासह कर्मचारी दाखल झाले आहेत. यावेळी पोलिसांनी घटनास्थळाची पाहणी करून प्रथम कॅनॉलच्या पाण्याचा प्रवाह बंद करून पोलिसांनी नागरिकांच्या मदतीने संबंधित युवतीचा शोध घेतला. सुमारे चार तास शोध कार्य केल्यानंतर टेंभू धरणाच्या टप्पा नंबर दोनमध्ये तिचा मृतदेह आढळून आला.

हा मृतदेह पोलिसांनी ताब्यात घेऊन जिल्हा उपरुग्णालयांमध्ये शवविच्छेदनासाठी पाठवण्यात आला. टेंभू ग्रामस्थांसह कराडमधील नागरिकांनीही घटनास्थळाकडे धाव घेतल्याने धरण परिसरात गर्दी झाली होती. या घटनेची नोंद कराड तालुका पोलिसात झाली असून तपास पोलिस करत आहेत.

रंगपंचमी सण हा महाराष्ट्रातील अनेक जिल्ह्यांमध्ये अतिशय उत्साहात साजरा केला जातो. नाशिक,पश्चिम महाराष्ट्र, कोकण या भागात आजच्या दिवशी रंगांची उधळण करण्यात येते. धुळवडीपेक्षा रंगपंचमीला अनेक गावांमध्ये जास्त महत्त्व असते. त्यामुळे हा सण साजरा करत असतानाच साताऱ्यातील कराडमध्ये झालेल्या तरुणीच्या निधनाने सणाला गालबोट लागले.