तडीपारी संपवून आलेल्या गुंडाने साथीदारांच्या मदतीने अन्य एका गुन्हेगाराची हत्या केली. ही थरारक घटना रविवारी सकाळी अंबाझरी पोलीस ठाण्याच्या हद्दीतील पांढराबोडी परिसरात घडली. टोळीयुद्धातून हे हत्याकांड घडले असून, पोलिसांच्या कार्यक्षमतेवर प्रश्नचिन्ह निर्माण झाले आहे. दीपक गोविंद बसवंते (वय ३५, रा. पांढराबोडी) असे मृतकाचे नाव आहे. या प्रकरणी पोलिसांनी प्रशांत इंगोले ऊर्फ खाटिक (वय ३८, रा. पांढरबोडी) आणि त्याच्या साथीदाराविरुद्ध खुनाचा गुन्हा दाखल केला. प्रशांत हा एक महिन्यांपूर्वीच तडीपारी संपवून परत आला.

गेल्या अनेक दिवसांपासून दीपक आणि प्रशांतमध्ये वाद सुरू आहे. रविवारी सकाळी दारूच्या दुकानासमोर दोघांमध्ये वाद झाला. नागरिकांनी मध्यस्थी करून वाद सोडविला. दीपक आपल्याला ठार मारेल, अशी भीती प्रशांतला वाटायला लागली. त्याने साथीदारांच्या मदतीने दीपकच्या हत्येचा कट आखला. प्रशांत हा साथीदारांसह दीपकच्या घरी गेला. यावेळी दीपक हा घराबाहेर उभा होता. प्रशांत आणि त्याच्या साथीदारांनी चाकूने दीपकवर वार केले.
Nandurbar News : नवस फेडण्यासाठी जात असलेल्या 10 वर्षीय बालिकेला कुटुंबीयांसमोर बिबट्याने फरपटत नेले
रक्ताच्या थारोळ्यात दीपक खाली कोसळला. हत्येनंतर प्रशांत आणि त्याचे साथीदार पसार झाले. घटनेची माहिती मिळताच अंबाझरी पोलिसांचा ताफा तिथे पोहोचला. पोलिसांनी दीपकला हॉस्पिटलमध्ये दाखल केले. डॉक्टरांनी तपासून त्याला मृत घोषित केले. याप्रकरणी अंबाझरी पोलिसांनी खुनाचा गुन्हा दाखल करून मारेकऱ्यांचा शोध सुरू केला आहे. प्रशांतविरुद्ध शारीरिक दुखापतीसह अनेक गुन्हे दाखल आहेत. त्याच्याविरुद्ध एमपीडीएअंतर्गत स्थानबद्धतेचीही कारवाई करण्यात आली होती. दीपकही गुन्हेगार होता. त्यालाही स्थानबद्ध करण्यात आले होते.