Mumbai News: मुंबई महापालिकेने आता येत्या शैक्षणिक वर्षापासून विद्यार्थिनींना पर्यावरणपूरक आणि जैवविघटनशील सॅनिटरी नॅपकिन पुरवण्याचा निर्णय घेतला आहे.
मुंबई महापालिकेच्या शिक्षण विभागांतर्गत १९१ माध्यमिक शाळा आहेत. या माध्यमिक शाळांमधील विद्यार्थिनींना मोफत सॅनिटरी नॅपकिन पुरवण्यासाठी पालिकेच्या अर्थसंकल्पात तरतूद केली जाते. २०२४-२५ या वर्षासाठी या साठी १६ लाखांची प्राथमिक तरतूद होती. तर सुधारित तरतूद ३० लाखांची करण्यात आली. यंदाच्या अर्थसंकल्पात यात वाढ होऊन १९ लाखांची प्राथमिक तरतूद झाली असून अतिरिक्त तरतूद ३० लाखांपर्यंतची आहे. कांदिवली येथील एमजी क्रॉस रोड क्रमांक १ येथील मुंबई पब्लिक स्कुलमध्ये नुकत्याच झालेल्या मासिक पाळी व स्वच्छता कार्यक्रमानिमित्त केंद्रीय मंत्री पीयूष गोयल यांनी सात हजार मुलींना सॅनिटरी पॅडचे वाटप केले. त्या वेळी बोलताना त्यांनी महापालिका शाळांमधील विद्यार्थिनींना दरमहा २० सॅनिटरी नॅपकिन पुरवण्याचे निर्देश पालिका अधिकाऱ्यांना दिले.
हमासला पाठिंबा दिल्याचा आरोप; भारतीय विद्यार्थिनीचा व्हिसा अमेरिकेने केला रद्द, कोण आहेत रंजनी श्रीनिवास?
याबाबत मुंबई महापालिकेच्या उपायुक्त (शिक्षण) प्राची जांभेकर यांना विचारले असता, त्यांनी याबाबत प्राथमिक बोलणी झाली असल्याचे नमूद केले. महापालिकेकडून माध्यमिक शाळांमधील विद्यार्थिनींना सॅनिटरी नॅपकिन पुरवले जातात. त्यासाठी अर्थसंकल्पीय तरतूदही असते. केंद्रीय मंत्री पीयूष गोयल यांनी त्यांच्या माध्यमातून पर्यावरणपूरक आणि जैवविघटनशील सॅनिटरी नॅपकिनचा पुरवठा केला, ही बाब चांगलीच आहे. असेच पॅड सर्व शाळांमध्ये पुरवण्याचे लक्ष्य असल्याचे जांभेकर यांनी स्पष्ट केले. 
मुलांच्या शिक्षणासाठी दाम्पत्याचं मोठं पाऊल; फी भरण्यासाठी पैसे नसल्याने केली चोरी, नाशिकमधील प्रकार
महापालिकेच्या तरतुदीनुसार विद्यार्थिनींना नेहमी वापरात असलेले सॅनिटरी नॅपकिन पुरवले जातात. मात्र पर्यावरणपूरक आणि जैवविघटन होणारे नॅपकिन पुरवण्यासाठीचा खर्च थोडा जास्त आहे. त्यासाठी आम्हाला सीएसआर निधीची मदत लागणार आहे. हा निधी मिळवण्यासाठी प्रयत्न सुरू आहेत. त्यासाठीची प्राथमिक बोलणीही झाली आहेत. येत्या दोन महिन्यांत ही कार्यवाही पूर्ण करून महापालिकेच्या अखत्यारितील सर्व १९१ माध्यमिक शाळांमधील विद्यार्थिनींना पॅड पुरवण्यात येतील, अशी माहिती प्राची जांभेकर यांनी दिली.
वेळीच कारवाई का नाही? अवैध मशिदीबाबत मुंबई हायकोर्टाने ठाणे महापालिकेला फटकारले
मासिक पाळीबद्दल आता मुंबईसारख्या शहरात जनजागृती झाली आहे. मुंबई महापालिका आपल्या विद्यार्थिनींच्या सर्वांगीण विकासासाठी प्रयत्न करते. आरोग्य हा घटक विद्यार्थिनींबाबत सर्वोच्च प्राधान्याचा आहे. त्यामुळे मासिक पाळी आणि त्या अनुषंगाने येणाऱ्या आरोग्याच्या बाबी, याबाबत पालिका नेहमीच आग्रही असेल. – प्राची जांभेकर, उपायुक्त शिक्षण
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाइनमध्ये कन्सल्टंट म्हणून कार्यरत असून पत्रकारितेमध्ये पदव्युत्तर शिक्षण पूर्ण केले आहे. ऑनलाइन माध्यमांमध्ये फ्रीलान्सिंगचा २ वर्षांचा अनुभव आहे आणि आता मटा ऑनलाइनमध्ये आहे. जनरल बातम्यासोबतच गुन्हेगारीविषयक बातम्यांमध्ये रस.… आणखी वाचा