राज्यातील मुख्यमंत्री लाडकी बहीण योजनेच्या अंमलबजावणीबाबत राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी यासंदर्भात बुधवारी विधानसभेत तारांकित प्रश्न उपस्थित केला होता. त्यावेळी महिला व बालविकास मंत्री आदिती तटकरे यांनी यासंदर्भातील घोषणा केली. यावेळी शिवसेना उबाठाचे आमदार वरुण सरदेसाई यांनीही लाडक्या बहिणींना २१०० रुपये देण्याबाबत प्रश्न उपस्थित केला. ‘मुख्यमंत्री लाडकी बहीण योजनेतील ज्या पात्र लाभाथ्यांचे अर्ज अंगणवाडी सेविकांकडून भरण्यात येतील, त्यांना प्रोत्साहन भत्ता दिला जाईल, असे शासन निर्णयातच स्पष्ट करण्यात आले होते. त्यानुसार ३१ कोटींचा भत्ताची रक्कम महिला व बालविकास विभागाच्या जिल्हा कार्यक्रम अधिकाऱ्यांकडे देण्यात आली. २६ जिल्ह्यांमध्ये त्याच्या वाटपाचे काम सुरू झाले आहे’, असे त्या म्हणाल्या. ‘नमो शेतकरी योजनेत महिलांना १००० रुपयांचा निधी देण्यात येतो. शासन निर्णयानुसार १५०० पेक्षा जास्त हप्ता देता येणार नसल्याने शेतकरी योजनेतील महिलांना अधिकचे ५०० रुपयांचा हप्ता दिला जात आहे’, असे त्यांनी स्पष्ट केले.

विरोधकांचा सभात्याग
मुख्यमंत्री लाडकी बहीण योजनेतील लाभार्थी महिलांना २१०० रुपयांचा हप्ता कधी देणार, या प्रश्नावर मंत्र्यांनी समाधानकारक उत्तर न दिल्याने यावेळी विरोधकांनी सभात्याग करीत आपला विरोध दर्शविला. या प्रश्नी अनेक आमदाराना प्रश्न विचारायचे होते, मात्र तालिका अध्यक्ष्यांनी परवानगी नाकारल्याने विरोधकांनी घोषणाबाजी करीत विरोध दर्शविला.

‘लाडक्या बहिणींची फसवणूक होणार नाही’
मुख्यमंत्री लाडकी बहीण योजनाही ही महायुती सरकारची महत्त्वाकांक्षी योजना आहे. या लाडक्या बहिणींना २१०० रुपयांचा हप्ता देण्यासंदर्भात मुख्यमंत्री देवेंद्र फडणवीस, उपमुख्यमंत्री अजित पवार, उपमुख्यमंत्री एकनाथ शिंदे योग्य तो निर्णय घेतील. त्याचवेळी लाडक्या बहिणींची फसवणूक होणार नाही’, अशी स्पष्ट भूमिका तटकरे यांनी व्यक्त केली.