भर चौकात आलिशान कार थांबवून सिग्नलच्या खांबावर लघुशंका करणाऱ्या गौरव आहुजाने पळून गेल्यावर कारची पुढील व पाठीमागील नंबरप्लेट काढून टाकल्याचे तपासात समोर आले आहे. त्यामुळे त्याच्यावर भारतीय न्याय संहितेच्या कलम २३८ नुसार पुरावा नष्ट केल्याचा गुन्हा दाखल करण्यात आला आहे. आहुजाच्या कारमध्ये दारुची बाटली आणि ग्लासही सापडला असून, ते जप्त केल्याचे पोलिसांनी न्यायालयात सांगितले.
Ruturaj Phadke : ती अजून ठाण्याला पोहोचलीच नाही, मराठी मालिकेतील अभिनेत्याला डेपोतून फोन, तुम्ही दापोलीहून…
येरवड्यातील शास्त्रीनगर चौकात शनिवारी सकाळी साडेसात वाजता गौरव मनोज आहुजा (वय २५, रा. साठे कॉलनी, टिळक रस्ता) हा रस्त्यावर लघुशंका करीत असल्याची चित्रफीत समाजमाध्यमांत प्रसारित झाली. त्यानंतर त्याच्यासह भाग्येश प्रकाश ओसवाल (वय २२, रा. प्राइड हाइट्स सोसायटी, मार्केट यार्ड) यांच्याविरोधात भारतीय न्याय संहितेसह महाराष्ट्र पोलिस अधिनियम, मोटार वाहन कायदा आणि दारुबंदी कायद्यानुसार गुन्हे दाखल करण्यात आले आहेत. पोलिसांनी दोघांविरोधात गुन्हा दाखल करून भाग्येश ओसवालला अटक केली, तर गौरव आहुजा कराड येथे पोलिसांना शरण आला.

तत्पूर्वी, गौरव आहुजा पुण्यातून कोल्हापूरच्या दिशेने पळून गेला. हातकणंगले येथील आंबाफाटा येथे एका पेट्रोल पंपावर त्याने आलिशान कार लावली. त्यानंतर तो भाड्याने मोटार घेऊन पुण्यात परतल्याचे पोलिसांच्या तपासात समोर आले. पोलिसांनी त्याला घटनास्थळ; तसेच आंबाफाटा येथील पेट्रोल पंपावर पंचासोबत पाहणीसाठी नेले. तेथे कारची पुढील व पाठीमागील नंबरप्लेट गायब असल्याचे आढळले. त्याबाबत गौरव आहुजाकडे विचारणा केली असता, त्याने उडवाउडवीची उत्तरे दिली. आरोपी व अज्ञात व्यक्तीने स्वतःचा बचाव करण्यासाठी गुन्ह्याचा पुरावा नाहीसा करण्याच्या उद्देशाने नंबरप्लेटची विल्हेवाट लावली आहे. याशिवाय आरोपीच्या कारमध्ये दारूची बाटली सापडली आहे.
Pune Crime : पुण्यात ‘विकृत’ मनोज अहुजाचं रस्त्यात अश्लील वर्तन, रुपाली पाटील भडकल्या, किती निर्लज्ज आहे, एवढा मोठ्या…

आहुजाचा मुक्काम कोठडीतच

पोलिस कोठडीची मुदत संपल्याने गौरव आहुजा आणि भाग्येश ओसवालला सोमवारी न्यायालयात हजर करण्यात आले. गौरव आहुजाचा मोबाइल अद्याप मिळालेला नाही. त्याने मोबाइल कारमध्येच ठेवला असल्याचे सांगितले; परंतु तो सापडलेला नाही. आरोपींनी कोणत्या ठिकाणी अमली पदार्थ अथवा मद्याचे सेवन केले, याबाबत तपास करायचा आहे. त्यासाठी आरोपीच्या पोलिस कोठडीत वाढ करण्यात यावी, अशी मागणी सरकारी वकील योगेश कदम आणि तपास अधिकारी विजय ठाकर यांनी न्यायालयात केली. बचाव पक्षातर्फे ॲड. पुष्कर दुर्गे यांनी बाजू मांडली. दोन्ही पक्षांचा युक्तिवाद ऐकल्यावर प्रथमवर्ग न्यायदंडाधिकारी एन. एस. बारी यांनी आहुजाच्या पोलिस कोठडीत एका दिवसांची वाढ केली, तर ओसवालची रवानगी न्यायलयीन कोठडीत केली.