अर्थसंकल्पीय अधिवेशनाच्या सहाव्या दिवसाच्या कामकाजासाठी जितेंद्र आव्हाड विधिमंडळात पोहोचले. तेव्हा त्यांना राज ठाकरेंनी महाकुंभातील स्नानाबद्दल केलेल्या विधानाविषयी प्रतिक्रिया विचारण्यात आली. ‘राज ठाकरेंनी महाकुंभावर विधान केलंय. त्यांनी असं असं केलं’, असं म्हणत आव्हाड यांनी राज ठाकरेंप्रमाणेच बगला साफ करण्याची नक्कल केली. ‘हे जर आम्ही केलं असतं ना, तर आतापर्यंत आमच्या घरावर मोर्चे आले असते. घरावर दगडफेक झाली असती. आम्ही देशद्रोहीदेखील ठरलो असतो,’ असं आव्हाड पुढे म्हणाले.

‘राज ठाकरेंनी त्यांचं मत त्यांनी व्यक्त केलं. भारतात सगळ्यांना सगळी मतं व्यक्त करण्याचं स्वातंत्र्य आहे. किंबहुना मी राज ठाकरेंचं अभिनंदन करेन की असं हिमतीनं बोलणारा माणूस महाराष्ट्रात आहे. हिंमत लागते हे सगळं बोलायला. आपल्या मनातलं बोलताना हिंमत लागते. आम्ही कद्रू झालो आहोत. आम्ही षंढ झालो आहोत. आम्ही बोलायला पण घाबरतो. राज ठाकरे त्यांच्या मनातलं बिनधास्त बोलले आणि ते कित्येक भारतीयांच्या मनात आहे. त्यांच्या धाडसाला सलाम आहे. बाकी मला यावर काही बोलायचं नाही. राज ठाकरेच्या धाडसाला सलाम इतकंच मी म्हणेन,’ अशा शब्दांत आव्हाडांनी राज यांचं कौतुक केलं.

काय म्हणालेले राज ठाकरे?
मनसे अध्यक्ष राज ठाकरे यांनी महाकुंभ मेळ्यातील स्नानाची खिल्ली उडवली. बाळा नांदगावकर यांनी आपल्यासाठी तिथलं पाणी आणलं असता पिण्यास नकार दिल्याचंही जाहीरपणे सांगितलं. या सगळ्या श्रद्धा, अंधश्रद्धेतून बाहेर पडा असा सल्लाही त्यांनी दिला. मनसेच्या १९व्या वर्धापन दिनाच्या कार्यक्रमात ते बोलत होते.

‘मुंबईत त्या दिवशी बैठक ठेवली होती. त्या बैठकीला शाखाध्यक्ष, उपाध्यक्ष आणि विभाग अध्यक्ष हजर झाले नाहीत. मग हजर झाले नाहीत त्यांची हजेरी घेतली. प्रत्येकाला कारण विचारलं. त्यातील पाच सहा जणांनी कुंभला गेला होतो सांगितलं. त्यांना म्हटलं मग गधड्यांनो पापं कशाला करता? आल्यावर आंघोळ केलीस का हेदेखील विचारलं. आमचे बाळा नांदगावकर कमंडलूमधून पाणी घेऊन आले. मी म्हटलं हड मी नाही पिणार. मी त्या सोशल मीडियावर व्हिडीओ पाहतोय तिथे आलेल्या बाया, पुरुष अंग घासतायत आणि बाळा नांदगावकर म्हणतात साहेब हे गंगेचं पाणी घ्या, कोण पिणार ते पाणी?,’ अशा शब्दांत राज यांनी महाकुंभातील स्नानाची खिल्ली उडवली.