रत्नागिरी जिल्ह्याच्या राजकारणात सध्या समोर विरोधक न ठेवता त्यांना आपल्याच पक्षात घेऊन विरोधी पक्षाला हादरा देण्याची खेळी सुरू आहे. एकेकाळी कट्टर विरोध असलेले एकमेकांचे तोंड न पाहणारे आता एकमेकांच्या गळ्यात गळे घालून राजकारण एकत्र काम करत असताना दिसत आहेत. एकेकाळी माजी मंत्री व शिवसेनेचे नेते रामदास भाई कदम यांचे कट्टर विरोधक असलेले संजय कदम आता लवकरच शिवसेनेत प्रवेश करणार आहेत. दरम्यान त्याआधीच त्यांची उबाठाकडून हकालपट्टी करण्यात आल्याचे पत्रक जारी करण्यात आल आहे.

या पत्रकात म्हटले आहे की, जिल्हाप्रमुख संजय वसंत कदम यांची शिवसेना (उद्धव बाळासाहेब ठाकरे) पक्षातून हकालपट्टी रत्नागिरी (खेड, गुहागर, दापोली, मंडणगड) जिल्ह्याचे जिल्हाप्रमुख संजय वसंत कदम यांनी पक्षविरोधी कारवाया केल्यामुळे माननीय शिवसेना (उद्धव बाळासाहेब ठाकरे) पक्षप्रमुख श्री. उध्दवजी ठाकरे यांच्या आदेशाने शिवसेना (उद्धव बाळासाहेब ठाकरे) पक्षातून हकालपट्टी करण्यात आली आहे. अशी माहिती शिवसेना (उद्धव बाळासाहेब ठाकरे) मध्यवर्ती कार्यालयातून प्रसिद्धीस देण्यात आलेल्या पत्रकाद्वारे कळविण्यात आली आहे.

या पत्रकावर विनायक राऊत नेते, सचिव-शिवसेना (उद्धव बाळासाहेब ठाकरे)

कोण आहेत संजय कदम ?

खेड तालुक्यातील चिंचघर येथील असलेले संजय कदम यांनी सरपंच पदापासून आपली राजकीय कारकिर्दीची सुरुवात केली. त्यानंतर ते जिल्हा परिषदेचे सदस्य झाले त्यांनी जिल्हा परिषदेचे उपाध्यक्ष पद ही भूषवलं होतं. दरम्यान त्यावेळी त्यांना रत्नागिरी जिल्हा परिषदेचे अध्यक्षपद मिळू शकल नाही याच मुद्द्यावरून त्यांचे शिवसेनेचे तत्कालीन माजी आमदार सूर्यकांत दळवी यांच्याबरोबर त्यांचे बिनसले होते यावरूनच त्यांनी शिवसेना सोडून राष्ट्रवादी प्रवेश केला त्यानंतर ते 2014 साली सूर्यकांत दळवी यांच्या विरोधात निवडणूक लढवून दापोली मतदारसंघाचे आमदार झाले. त्यानंतर 2019 मध्ये व नुकत्याच झालेल्या विधानसभा निवडणुकीत त्यांना दोन वेळा आमदार योगेश कदम यांच्याकडून पराभव पत्करावा लागला. यानंतर आता ते पुन्हा शिवसेनेत परतणार आहेत एककाळचे ते रामदास कदम यांचे उजवे हात म्हणून ओळखले जात पक्ष सोडल्यानंतर रामदास कदम व संजय कदम यांच्यात टोकाच राजकीय वैमनस्य निर्माण झालं होतं.