Pune Crime News: एक मुलगी आपल्या घरातून बेपत्ता झाली असून २८ दिवसांनंतरही पोलिस तिचा शोध लावण्यात अपयशी ठरले आहेत. यावरुन मुलीच्या कुटुंबीयांनी पोलिसावर हलगर्जीपणाचा आरोप लावला आहे.
आईची पोलीस ठाण्यात तक्रार, पण तपासाचा वेग मंद असल्याचा आरोप
कोमल भोसले (वय ३१) या मुलीच्या आईने पर्वती पोलीस ठाण्यात ७ फेब्रुवारी २०२५ रोजी तक्रार दाखल केली होती. तक्रार दाखल झाल्यानंतर पोलिसांनी गुन्हा नोंदवला असला, तरी शोधमोहीम संथ गतीने सुरू असल्याचे कुटुंबीयांचे म्हणणे आहे.
मुलगी घरातून बेपत्ता, आईची पोलिसांत तक्रार
७ फेब्रुवारी रोजी कोमल भोसले आपल्या कामावर गेल्या असताना त्यांच्या नवऱ्यासोबत त्यांचे तीनही मुलं घरी होते. त्यानंतर काही वेळाने त्यांच्या मुलाचा फोन आला आणि त्याने सांगितले की बहीण घरातून निघून गेली असून अद्याप परत आलेली नाही. त्यामुळे घाबरलेल्या आईने तत्काळ पोलीस ठाण्यात जाऊन तक्रार नोंदवली.
अज्ञात मुलाने फूस लावून पळवून नेल्याची शक्यता
प्राथमिक तपासात एका अज्ञात तरुणाने मुलीला फूस लावून पळवून नेल्याची शक्यता वर्तवण्यात आली आहे. मात्र, २८ दिवस उलटूनही पोलीस तिचा ठावठिकाणा लावण्यात अपयशी ठरले आहेत.
कुटुंबाची चिंता वाढली
नुकतीच स्वारगेट पोलीस ठाण्याच्या हद्दीत एका तरुणीवर बलात्काराची घटना घडल्यामुळे नागरिकांमध्ये भीतीचे वातावरण आहे. कुटुंबीयांना आपल्या मुलीबाबतही अशीच भीती वाटत आहे. अल्पवयीन मुलगी शाळेच्या नवव्या इयत्तेत शिकत असल्याने तिचे शैक्षणिक नुकसानही होत आहे. पोलीस प्रशासनाने तातडीने शोधमोहीम राबवून मुलीला परत आणावे, अशी कुटुंबीयांची मागणी आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा