एकट्या महिला लक्ष्य

दत्तात्रय गाडेविरोधात दाखल सहाही गुन्ह्यांध्ये तो एकट्या महिलांना फसवून लूटमार करीत असल्याचे निदर्शनास येत आहे. बसची वाट पाहणाऱ्या महिलांना चारचाकीत बसवून तो निर्जनस्थळी नेऊन लुटायचा, असे त्याच्याविरोधात दाखल तक्रारीत नमूद आहे. सन २०१९मध्ये सुपा पोलिस ठाणे (अहिल्यानगर), कोतवाली पोलिस ठाणे (अहिल्यानगर), शिरूर पोलिस ठाणे (पुणे ग्रामीण) येथे गाडेवर गुन्हे दाखल आहेत. याशिवाय सन २०२०मध्येदेखील शिरूर आणि शिक्रापूर पोलिस ठाण्यांत त्याच्याविरोधात गुन्हे दाखल आहेत.

नगरहून पुण्याकडे जाण्यासाठी तक्रारदार महिला बसची प्रतीक्षा करीत होती. त्या वेळी गाडे चारचाकी घेऊन तिथे आला. ‘मीदेखील पुण्याला चाललो आहे, तुम्हाला सोडतो,’ असे त्याने महिलेला सांगितले. त्यानंतर चारचाकी निर्जनस्थळी नेऊन त्याने पीडितेचा गळा दाबून तिच्याकडील दागिने हिसकावले होते.

नगर बसस्थानकात पुण्याकडे जाणाऱ्या एसटीची वाट पाहणाऱ्या महिलेजवळ येऊन आरोपी गाडेने ‘पुणे, पुणे’ असा आवाज दिला. त्यावर महिलेने सहप्रवासी घेणार का, अशी विचारणा केली. त्यावर गाडेने होकार दिल्याने त्या गाडीत बसल्या. त्यानंतर गाडेने काही अंतरावर निर्मनुष्य ठिकाणी चारचाकी थांबवून महिलेला लुटले होते.

नीरा येथे जाण्यासाठी न्हावरा फाटा येथे थांबलेल्या महिलेपाशी आरोपी गाडे चारचाकीतून आला. त्याने महिलेला चौफुला येथे सोडण्याचे आश्वासन देऊन चारचाकीत बसविले. त्यानंतर काही अंतरावर चाक पंक्चर झाल्याचा बहाणा करून, वाहन थांबवून महिलेला धमकावून तिचे दागिने लुटले होते. याशिवाय भाजीविक्रेत्या महिलेच्या दुकानासमोर गाडी थांबवून त्याने तिच्याकडे शरीरसुखाची मागणी केली होती. संतापून महिलेने आरोपीच्या गाडीवर दगड मारल्यावर गाडेने तेथून पळ काढला होता.