पुण्यातील स्वारगेट बसस्थानकात पडक्या शिवशाही बसमध्ये २६ वर्षीय तरुणीवर अत्याचार झाला आहे. वर्दळीच्या बसस्थानकात ही घटना घडल्याने महिलेचा सुरक्षेचा प्रश्न गडद होत आहे. या घटनेनंतर चंद्रपूर येथील मुख्य बसस्थानकाचा महाराष्ट्र टाइम्सच्या प्रतिनिधीने आढावा घेतला असता सुरक्षा व्यवस्था वाऱ्यावरच असल्याचे धक्कादायक वास्तव समोर आले आहे.

चंद्रपूरचे बसस्थानक नवे करकरीत आहे. विधानसभा निवडणुकीपूर्वी त्याचे उद्घाटन झाले. त्यामुळे भौतिक सुविधा बसस्थानकावर बऱ्यापैकी आहेत. हिरकणी कक्ष, स्वच्छतागृहाची अवस्था मात्र वाईट आहे. तर चिंताजनक म्हणजे या परिसरात एकच पोलीस चौकी आहे, जी नेहमी बंद असते. पोलिसांची सुरक्षा नावाची गोष्ट याठिकाणी पाहायला मिळत नाही. पुण्यात घडलेल्या घटनेनंतर प्रशासन अलर्ट मोडवर आले आहे. आता वरिष्ठांकडून बसस्थानकांतील सुरक्षा वाढवण्याची मागणी केली जात आहे.

चंद्रपूर बसस्थानकावर सीसीटीव्ही आहेत. मात्र सीसीटीव्ही मॉनिटरिंगसाठी एकही कर्मचारी नाही. गर्दीच्या तुलनेत केवळ आठ सीसीटीव्ही असून ते अपुरे पडत आहेत. रात्री मुक्कामी असणाऱ्या बसेस प्रतिबंधित क्षेत्रातील आगारातच असतात. पहाटेच्या गाड्यांसाठी १० ते १५ कर्मचारी मुक्कामी असतात. आगार व्यवस्थापकाने पोलीस चौकी सुरू करण्यासंदर्भात पत्रव्यवहार केला. मात्र ती सुरू होऊ शकलेली नाही. त्यामुळे सर्वसामान्य प्रवाशांनी सुरक्षेसाठी कुणाकडे पाहायचे, असा प्रश्न या निमित्ताने उपस्थित होत आहे.