Pune News: पुण्यात विविध कारणांमुळे गेल्या तीन वर्षांत ७० नर्सिंग होम आणि ४२५ क्लिनिक (डिस्पेंसरी) बंद पडल्याची माहिती समोर आली आहे. त्यामुळे ‘फॅमिली डॉक्टर’ या संकल्पनेबरोबरच आगामी काळात लहान रुग्णालये इतिहासजमा होण्याची भीती वैद्यकीय तज्ज्ञांनी व्यक्त केली.
गेल्या तीन वर्षांत ७० नर्सिंग होम बंद पडल्याने शहरातील एकूण खाटांची संख्या कमी झाली आहे. हे नर्सिंग होम बंद पडण्यापूर्वी शहरात सर्व प्रकारचे ९२० रुग्णालये होते. या ९२० रुग्णालयांत २४ हजार ७५ खाटा उपलब्ध होत्या. ३१ डिसेंबर २०२४पर्यंतच्या आकडेवारीनुसार, शहरात सर्व प्रकारची ८५० रुग्णालये असून, यात २३ हजार २१० खाटांची सुविधा आहे.
महाशिवरात्रीलाच धक्कादायक निर्णय; आधी शंकराचं दर्शन नंतर दुचाकीतलं पेट्रोल अंगावर टाकलं अन्…
शहरात वाढत असलेली खासगी कॉर्पोरेट रुग्णालयांची संख्या, लहान दवाखान्यांसाठी असलेले जाचक सरकारी नियम, रुग्णालय नोंदणी शुल्कातील वाढ, जैववैद्यकीय कचऱ्याची विल्हेवाट लावण्याचा खर्च या कारणांमुळे लहान दवाखाने अडचणीत आल्याचे डॉक्टरांचे म्हणणे आहे.
या तीन वर्षांच्या कालावधीत नर्सिंग होम आणि डिस्पेंसरीबरोबरच दोन रक्तपेढ्या आणि १२६ आरोग्य प्रयोगशाळाही बंद पडल्या आहेत. पुण्यात गेल्या काही वर्षांत मोठ्या रुग्णालयांची संख्या वाढली आहे. त्यामुळे मुंबई, दिल्ली, चेन्नई या मोठ्या महानगरांप्रमाणेच पुण्यातही सर्व प्रकारच्या सुविधा उपलब्ध झाल्या आहेत. यामुळे मोठ्या रुग्णालयांमध्ये जाणाऱ्या रुग्णांचे प्रमाण वाढले आहे. लहान रुग्णालयांमध्ये वैद्यकीय विमा आणि सरकारी योजना लागू नसतात याचाही फटका या रुग्णालयांना बसत असल्याचे निरीक्षण डॉक्टरांनी नोंदविले. दर तीन वर्षांनी रुग्णालय नूतनीकरणाचा खर्च २५ टक्क्यांनी वाढत असल्याचेही डॉक्टरांनी सांगितले.
मोठी बातमी! मध्य रेल्वेवर दोन दिवस विशेष ब्लॉक; CSMTवरुन सुटणाऱ्या ५९ लोकल, ‘या’ मेल-एक्स्प्रेस रद्द, पाहा वेळापत्रक
रुग्णालय सुरू करण्यासाठी आणि चालविण्यासाठी असलेल्या नियमांची पूर्तता लहान दवाखान्यांना करणे शक्य नसते. आर्थिक खर्च, मनुष्यबळाचा खर्च यामुळे लहान दवाखान्यांना अनेक अडचणींचा सामना करावा लागतो. त्यामुळे शहरातील अनेक ज्येष्ठ डॉक्टरांनी दैनंदिन ‘ओपीडी’ बंद केल्याचे दिसून येते. – डॉ. दिलीप देवधर, ज्येष्ठ फॅमिली डॉक्टर
साताऱ्याच्या लेकीची अमेरिकेत मृत्यूशी झुंज; नीलम शिंदेच्या कुटुंबाला अखेर दिलासा, व्हिसा मिळण्याचा मार्ग मोकळा
आर्थिक खर्च, जाचक अटीमुळे लहान आणि मध्यम स्वरूपाचे दवाखाने अडचणीत आले आहेत. ‘फॅमिली डॉक्टर’ आणि लहान दवाखाने रुग्णासाठी आवश्यक आहेत. त्यामुळे सरकारने लहान आणि मध्यम दवाखान्यांची जाचक अटीतून मुक्तता करावी.-डॉ. संजय पाटील, राष्ट्रीय सचिव, हॉस्पिटल बोर्ड ऑफ इंडिया
लहान रुग्णालयांच्या मागण्या
■ परवाना नूतनीकरण शुल्क कमी करावे.
■ अनावश्यक मनुष्यबळाची सक्ती करू नये.
■ १० ते ३० खाटांच्या रुग्णालयांना जाचक अटी लावू नयेत.
■ पूर्वीपासून असलेल्या रुग्णालयांना बांधकाम बदलण्याची सक्ती करू नये.
गेल्या पावणेतीन वर्षातील आकडेवारी
(बंद पडलेले दवाखाने, महापालिका नोंदणीनुसार)
वर्ष नर्सिंग होम डिस्पेंसरी
२०२२ –१८ –८२
२०२३ –३८ –२६५
२०२४ –१४ –८७
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाइनमध्ये कन्सल्टंट म्हणून कार्यरत असून पत्रकारितेमध्ये पदव्युत्तर शिक्षण पूर्ण केले आहे. ऑनलाइन माध्यमांमध्ये फ्रीलान्सिंगचा २ वर्षांचा अनुभव आहे आणि आता मटा ऑनलाइनमध्ये आहे. जनरल बातम्यासोबतच गुन्हेगारीविषयक बातम्यांमध्ये रस.… आणखी वाचा