गुनाट गावात पोलिसांचा फौजफाटा, दत्ताचा शोध सुरु

पोलीस मोठ्या प्रमाणात त्याचा शोध घेत आहेत. त्यासाठी २३ पथकं तैनात करण्यात आली होती. मात्र, पोलिसांना असा संशय आहे की तो गुनाट गावातच कुठेतरी लपून बसला आहे. त्यामुळे १०० पोलिसांचं पथक या गावात दाखल झालं असून त्याचा शोध घेतला जात आहे. ठिकठिकाणी त्याचा शोध घेतला जात आहे. तो अखेरचा जिथे दिसला तेथून १० किलोमीटरच्या अंतरात पोलिसांटा फौजफाटा तैनात करण्यात आला आहे. पोलिसांना पूर्ण संशय आहे की तो याच परिसरात लपलेला आहे. त्याच्याकडे जास्त पैसेही नाहीत. त्यामुळे तो लांबपर्यंत पळून जाऊ शकत नाही, हे पोलिसांना कळालं आहे.

परिसराजवळील एसटी स्थानक, रेल्वे स्थानक आणि महामार्गावरही पोलिसांची नाकाबंदी आहे. त्यामुळे तो कुठे पळून जाऊ शकत नाही. पोलिसांनी आरोपी दत्तात्रय गाडेवर बक्षीसही ठेवलं आहे. त्याची माहिती देणाऱ्याला १ लाख रुपये देण्यात येणार आहेत. त्यामुळे गावकरीही पोलिसांची मदत करत आहेत.

आरोपी दत्तात्रय गाडे उसाच्या शेतात लपून बसल्याचा संशय

या परिसराच्या जवळून नदी वाहते त्यामुळे येथे उसाची शेती केली जाते. याच उसाच्या शेतीत आरोपी लपून बसला असल्याचा संशय पोलिसांना आहे. या शेताच्या जवळच एक घर आहे, तिथे बुधवारी संध्याकाळी आरोपी दत्तात्रय गाडे अखेरचा दिसला होता. त्याने त्या घरी पिण्यासाठी पाणी मागितलं होतं. घरातल्या लोकांनी पोलिसांनी सांगितलं की तो इथे आला होता, त्यानंतर तो शेतात निघून गेला आहे. त्यामुळे त्या घराच्या परिसरात, आसपासच्या १० किलोमीटरच्या परिसरात पोलीस तैनात करण्यात आले आहेत.

यापूर्वी मिळालेल्या माहितीनुसार, स्वारगेट एसटी बस डेपोमध्ये तरुणीवर अत्याचार केल्यानंतर आरोपी आपल्या गुनाट या गावी आला. तिथे तो बुधवारी किर्तनातही सहभागी झाला होता. त्यानंतर जेव्हा दुपारी माध्यमांवर त्याला आपला फोटो नावासह दिसला त्यानंतर त्याने पळ काढला आहे.

सध्या पोलीस अॅक्शनमोडमध्ये असून लवकरच त्याला पकडण्यात येईल असं सांगण्यात येत आहे. तो जास्त वेळ लपून राहणार नाही, असं पोलिसांचं म्हणणं आहे. जर वेळ आली तर पोलीस त्या शेतात शिरुन त्याचा शोध घेतील, त्यासाठीच इतका मोठा फौजफाटा गावात बोलावण्यात आला आहे.