Jalgaon Reel Star Murder: जळगावात एका खान्देशी रील स्टारचा कुजलेल्या अवस्थेतील मृतेदह सापडला आहे. दोन दिवसांपूर्वी त्याच्या वडिलांनी आत्महत्या केली होती. त्यानंतर आज त्याचा मृतदेह सापडल्याने एकच खळबळ माजली आहे.
ही घटना धरणगाव तालुक्यातील असून रील स्टार असलेल्या एका तरुणाचा मृतदेह आढळून आल्याची धक्कादायक बाब गुरुवारी २६ फेब्रुवारी रोजी दुपारी २ वाजेच्या सुमारास उघडकीला आली आहे. विशेष म्हणजे त्याच्या वडिलांनी दोन दिवसांपूर्वी सुसाईड नोट लिहून आत्महत्या केली होती. या घटनेमुळे धरणगाव तालुका हादरला आहे. विकी उर्फ हितेश विठ्ठल पाटील (वय २२ रा. भोरखेडा तालुका धरणगाव हल्ली मुक्काम एरंडोल) असं मयत झालेल्या रील स्टार तरुणाचे नाव आहे.
दोन दिवसांपासून बेपत्ता होता विकी पाटील
विकी पाटील हा तरुण एरंडोल शहरात राहत होता. त्याचे आईवडील देखील एरंडोल शहरातच राहत होते. त्याचे वडील विठ्ठल सखाराम पाटील हे माजी सैनिक होते. त्यांचा मुलगा विकी पाटील हा कुणाला काहीही न सांगता गेल्या दोन दिवसांपासून बेपत्ता होता. तर दुसरीकडे मंगळवारी २५ फेब्रुवारी रोजी विठ्ठल पाटील यांनी गळफास घेत आपली जीवनयात्रा संपवली होती. त्यावेळी त्यांनी सुसाईड नोट लिहून स्वतःचे जीवन संपविले होते. या दोन्ही घटनेचा ताळमेळ जुडवून पोलिसांनी तपासाला सुरूवात केली होती.
अशातच गुरुवारी २७ फेब्रुवारी रोजी दुपारच्या सुमारास विकी पाटील यांचा मृतदेह भोरखेडा गावाजवळ असलेल्या एका नाल्याजवळ पुरल्याची धक्कादायक माहिती पोलीसांना मिळाली. त्यानुसार पोलिसांनी जेसीबीच्या मदतीने कुजलेल्या अवस्थेतील मृतदेह बाहेर काढला. या घटनेची माहिती मिळाल्यानंतर जळगाव येथून पोलीस अधीक्षक महेश्वर रेड्डी अप्पर पोलीस अधीक्षिका कविता नेरकर यांच्यासह धरणगाव पोलीस ठाण्याचे पोलीस निरीक्षक पवनकुमार देसले आणि पोलीस पथक घटनांसाठी दाखल झाले. दरम्यान पोलिसांनी पंचनामा करून मृतदेह नाल्यातून बाहेर काढला. या घटनेमुळे परिसरात एकच खळबळ उडाली.
एकीकडे त्याच्या वडिलांनी सुसाईड नोट लिहून या घटनेची माहिती दिली होती तर दुसरीकडे सुसाईड नोट प्रमाणे त्यांच्या मुलाचा मृतदेह देखील आढळून आला आहे. या घटनेमागील कारण किंवा मारेकरी यांच्या संदर्भात अद्याप कोणतीही माहिती समोर आलेली नाही. या घटनेबाबत धरणगाव पोलीस ठाण्यात गुन्हा दाखल करण्याचे काम सुरू आहे.
खानदेशच्या रील स्टार म्हणून ओळख
विकी हा गेल्या अनेक वर्षांपासून युट्युब, फेसबुक आणि इंस्टाग्राम यावरती रील टाकून प्रेक्षकांना त्याच्याकडे आकर्षित करण्याचा प्रयत्न करत होता. त्याचप्रमाणे युट्युबवर त्याने अनेक अहिराणी गाण्यांमध्ये काम देखील केले आहे. त्याचे सोशल मीडियावर मोठ्या प्रमाणात फॉलोवर्स देखील आहेत. त्याच्या लग्नानंतर तो आणि त्याची पत्नी दोघेजण व्हिडिओ आणि रील बनवायचे. खान्देशचा रील स्टार म्हणून त्याची ओळख होती.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा