Satara Girl Accident In US: अमेरिकेत एका सातारच्या मुलीचा भीषण अपघात झाला. या अपघातात ती गंभीर जखमी झाली असून सध्या ती कोमामध्ये आहे. पण, तिच्या पालकांना भारतातून अमेरिकेत जाण्यासाठी व्हिसा मिळत नाहीये.
कारच्या धडकेत नीलम गंभीर जखमी
नीलम शिंदे ही अमेरिकेत गेली चार वर्षांपासून एमएस शिक्षण घेत असून ती शेवटच्या वर्षाला शिकत आहे. नीलम हिचा १४ फेब्रुवारी २०२५ रोजी अपघात झाला. अमेरिकेत व्यायामासाठी चालत जात असताना एका चारचाकी गाडीने पाठीमागून जोरदार धडक दिली. या घटनेत ती गंभीररित्या जखमी झाली होती. या अपघाताला दोषी असलेल्या कारचालकाला पोलिसांनी अटक केली आहे. मात्र, रक्तातील नातेवाईक आल्याशिवाय गुन्हा दाखल होत नसल्याचे अमेरिकेतील पोलीस सांगत आहेत.
नीलम हिचे या अपघातात दोन्ही हातापाय, डोक्याला गंभीर दुखापत झाली आहे. तिच्या छातीलाही मार लागला असल्याने ती कोमात गेली असल्याचे अमेरिकेतील डॉक्टरांनी सांगितले आहे. तसे अमेरिकेतील हॉस्पिटलने पत्र दिलं आहे. तिची रूममेट खुशी ही महाराष्ट्रातील तरुणी असून तिच्याकडून वडगाव (उंब्रज)मधील नीलमच्या पालकांना माहिती देत आहे.
पालकांना व्हिसा मिळेना
मरणाच्या दारात असताना तिच्याकडे जाण्यासाठी तिच्या पालकांना भारतातून व्हिसा मिळत नाहीये. याकामी केंद्रीय मंत्री मुरलीधर मोहोळ, माजी खासदार श्रीनिवास पाटील, माजी सहकारमंत्री बाळासाहेब पाटील यांच्याकडून व्हिसासाठी संपर्क केला. तरी त्यांनी दाद दिली नाही. मुंबईतील कुर्ला येथे पासपोर्ट व्हिसा ऑफिसला पालक गेले तरीही दाद मिळाली नाही. त्यामुळे अमेरिकेत नीलम शिंदे हिच्या प्रकृतीची चिंता तर भारतात शिंदे कुटुंबियांना व्हिसा मिळवण्यासाठी धडपड करावी लागत आहे. मात्र, त्यांना अजून व्हिसा मिळालेला नाही. त्यामुळे त्यांची मुलीकडे जाण्याची चिंता वाढली आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा