साजिद पठाण यांच्या विजयाला भाजपच्या नेत्याचं आव्हान

विधानसभा निवडणुकीचा यंदाचा निकाल अनेकांना मानवलेला नाही. तर काहींना पचलेलाच नाहीये. याचा परिणाम म्हणजे विदर्भातील अशा अनेक पराभूत उमेदवारांनी निवडून आलेल्या आमदाराविरोधात याचिका दाखल केल्या आहेत. यात मुख्यत्वे आघाडीच्या तसेच भाजपविरुद्ध लढलेल्या उमेदवारांचा समावेश आहे. मात्र, काँग्रेसच्या विजयी उमेदवाराविरुद्ध केवळ एकच याचिका झाली आहे. अकोला पश्चिम मतदारसंघातील भाजपचे अधिकृत उमेदवार भाजपचे उमेदवार विजय कमलकिशोर अग्रवाल यांनी काँग्रेसचे विजयी उमेदवार साजिद पठाण यांच्या विजयाला आव्हान दिले आहे.

न्यायालयाने या प्रकरणी पठाण यांना नोटीस बजावली आहे, १८ मार्चपर्यंत उत्तर देण्याच्या सूचना

आज यावर न्यायमूर्ती अनिल पानसरे यांच्यासमक्ष सुनावणी झाली. न्यायालयाने या प्रकरणी पठाण यांना नोटीस बजावून १८ मार्चपर्यंत उत्तर सादर करण्याचे आदेश दिलेत. अग्रवाल यांच्याकडून ॲड. रोहन मालविय व ॲड. हरीष ठाकूर यांनी बाजू मांडली.

पराभूत उमेदवारांच्या २७ निवडणूक याचिका न्यायालयात दाखल

नागपूर खंडपीठात विदर्भातील एकूण २७ पराभूत उमेदवारांनी याचिका दाखल केल्यात. यात, ईव्हीएमने निवडणूक घेण्यापूर्वी या कायदेशीर प्रक्रियेची पूर्तता निवडणूक आयोगाने केली नाही. निवडणूक घेण्यासाठी नोटिफिकेशन निवडणूक आयोगाने काढले नाही, निकालानंतर पराभूत उमेदवारांना सीसीटीव्हीचे फुटेज, फॉर्म नंबर १७ दिले जात नाही. व्हीव्हीपॅटची मोजणीसुद्धा केली जात नाही, असे आरोप करण्यात आलेत. ॲड. आकाश मून व ॲड. पवन डहाट यांच्यामार्फत या याचिका दाखल करण्यात आल्या आहेत.