Sambhaji Brigade aggressive against Prashant koratkar : प्रशांत कोरटकर याच्या तोंडाला जो कुणी काळे फासेल किंवा त्याची धिंड काढेल त्याला आम्ही 1 लाख रुपयांचे रोख बक्षीस देणार, अशी जाहीर घोषणा संभाजी ब्रिगेडने केली आहे. छत्रपती शिवाजी महाराजांविरोधात आक्षेपार्ह विधान करणाऱ्या विरोधात शिवप्रेमी फुकट मारायला तयार होत आहेत. महिलांनी सुद्धा पुढे मागे करू नये, असंही संभाजी ब्रिगेडने म्हटलं आहे.
‘सोशल मीडियावरची क्लिपची सखोल चौकशी व्हावी’
सोशल मीडियावरील क्लिपची चौकशी गुन्हा दाखल करून इतिहासकार इंद्रजीत सावंत यांना तात्काळ पोलीस संरक्षण देण्याची मागणी संभाजी ब्रिगेडच्या वतीने सोलापूरचे जिल्हाधिकारी यांच्यामार्फत मुख्यमंत्री देवेंद्र फडणवीस यांना निवेदनाद्वारे आणि ईमेलद्वारे करण्यात आली. विविध माध्यमांचा वापर करून समाजामध्ये जातीय तेढ निर्माण करण्याचा प्रयत्न वारंवार होत आहे. यामागे कोण आहे, त्याची चौकशी करून तात्काळ गुन्हे दाखल करा, अशी मागणी संभाजी ब्रिगेडने केली आहे.
‘प्रशांत कोरटकर याचं सध्याचा ठिकाण सांगावे, त्याठिकाणी जाऊन मारू’
कोल्हापुरातील इतिहास तज्ज्ञ इंद्रजीत सावंत यांनी ऐतिहासिक दाखल्यावरून केलेल्या काही वक्तव्यावरून नाराज झालेल्या एका व्यक्तीने त्यांना फोन करून प्रचंड शिवीगाळ आणि जीवे मारण्याची धमकी दिली आहे. संभाजी ब्रिगेडच्या कार्यकर्त्यांनी थेट इशारा दिला आहे, प्रशांत कोरटकर यांनी सध्याचे लोकेशन सांगावे, आम्ही ताबडतोब त्या ठिकाणी जाऊन त्याला काळे फासणार, अशी संतप्त प्रतिक्रिया कार्यकर्त्यांनी दिली आहे.
‘फडणवीसानी कारवाई करावी; त्यांच्या नावाचा उल्लेख आहे ‘
“देवेंद्र फडणवीस राज्याचे मुख्यमंत्री आहेत आणि या राज्यातील सर्व जाती धर्माच्या लोकांचे प्रमुख आहेत. सदर व्यक्तीने दिलेल्या धमकी बद्दल पुढील कारवाई तर होईलच तथापि मुख्यमंत्री म्हणून आपल्या नावाचा स्पष्ट समावेश असल्याने सदर प्रकरणात मुख्यमंत्र्यांनी बाजू मांडणे अत्यंत आवश्यक आहे. मुख्यमंत्र्यांनी खुलासा करणे आणि इतिहास तज्ज्ञ इंद्रजीत सावंत यांना योग्य ती सुरक्षा पुरवणे अत्यंत आवश्यक आहे. अन्यथा धमकी देणाऱ्याला मुख्यमंत्री देवेंद्र फडणवीस पाठीशी घालत आहेत, असा संदेश राज्यात जाईल”, अशी प्रतिक्रिया संभाजी ब्रिगेडने दिली आहे.
Indrajit Sawant : ‘छावा’विरोधात मत मांडलं, म्हणून मुख्यमंत्र्यांचं नाव घेत कोरटकर धमकी देतोय, इतिहास संशोधक इंद्रजीत सावंत यांनी ऑडिओ क्लीप ऐकवली
‘शिवप्रेमी महिलांनी पुढाकार घ्यावा, त्या प्रशांतला बांगड्या घालाव्या’
संभाजी ब्रिगेडने जाहीर आवाहन केले आहे,”राज्यातील शिवप्रेमी महिलांनी एकत्रित येऊन पुढाकार घ्यावा, प्रशांत कोरटकर याला बांगड्या घालाव्यात आणि त्याला काळे फासावे. त्या महिलांचा आम्ही जाहीर सत्कार करू”, असे जाहीर केले आहे. “केंद्र सरकारने केंद्रीय पातळीवर एक कायदा पारित करावा, जो कुणी थोर महापुरुषांबद्दल वादग्रस्त विधान करेल त्याची जीभ काढली जाईल. जेणेकरून असे वक्तव्य कुणी करणार नाही”, असं मत संभाजी ब्रिगेडने मांडले आहे.