Eknath Shinde on Mahayuti Sarkar : महायुती म्हणजे ‘फेव्हिकॉल का मजबूत जोड है, तुटेगा नही’, अशा शब्दांत शिवसेनेचे मुख्य नेते उपमुख्यमंत्री एकनाथ शिंदे यांनी विरोधकांना सुनावले आहे.
एकनाथ शिंदे यांच्या उपस्थितीत शुक्रवारी पूर्व विदर्भात ‘दे धक्का’ मेळाव्यात ‘ऑपरेशन टायगर’ राबवण्यात आले. ठाकरे सेना, काँग्रेस, मनसेसह इतर पक्षाचे पदाधिकारी व कार्यकर्त्यांनी शिंदे गटाचे धनुष्यबाण हाती घेतले. विमानतळाजवळील मेट्रोच्या सभागृहात तसेच अन्य ठिकाणी झालेल्या कार्यक्रमांमध्ये ठाकरे गटाचे माजी जिल्हा प्रमुख राजू हरणे, युवक काँग्रेसचे नेते सुमुख मिश्रा, मनसेचे प्रदेश उपाध्यक्ष किशोर सरायकर, ठाकरे गटाच्या युवा सेनेचे जिल्हा प्रमुख, शरद सरोदे यांच्यासह वर्धा, चंद्रपूर, गडचिरोली, भंडारा, गोंदिया येथील ठाकरे गट, काँग्रेस, मनसे व अन्य संघटनांचे पदाधिकारी व कार्यकर्त्यांनी प्रवेश घेतला. 
Eknath Shinde : उद्धव ठाकरेंची ‘क्रेडिबिलिटी’संपली, एकनाथ शिंदेंचा घणाघात; संजय राऊतांवरही बोचरा वार
याप्रसंगी एकनाथ शिंदे म्हणाले, आमचा अजेंडा महाराष्ट्राच्या विकासाचा, गतिमान करण्याचा आहे. आपल्या भागाचा विकास व्हावा, या भावनेतून कार्यकर्ते शिवसेनेत येत आहेत. सर्वसामान्यांसाठी सोन्याचे दिवस यावे, यासाठी महायुती सरकार स्थापन झाले आहे. ‘ठाकरे गटाची पोटदुखी सातत्याने वाढत आहे. मात्र, डॉक्टरकडून उपचार करण्याऐवजी कम्पाऊंडरकडून औषध घेणारे महाभागही आहेत,’ असा टोलाही शिंदे यांनी संजय राऊत यांचे नाव न घेता लगावला आहे.
शिंदे पुढे म्हणाले, कार्यकर्ते हेच आमचे भांडवल, ऐश्वर्य व दौलत आहे. त्यांनी आम्हाला मोठे केले. महापालिका, जिल्हा परिषद, नगरपालिकांच्या निवडणुका कार्यकर्त्यांच्या आहेत. मालक आणि नोकरांचा हा पक्ष नाही तर, कार्यकर्त्यांचा आहे. समोरचे मात्र, अजुनही सहकाऱ्यांना घरगडी समजून राहिले. एकनाथ शिंदे डरणारा, घाबरणारा नाही. अशा अनेक धमक्या आल्या. गडचिरोलीचा पालकमंत्री असताना माओवाद्यांच्या धमक्यांना भीक घातली नाही. मुख्यमंत्री देवेंद्र फडणवीस यांनी गडचिरोलीचे पालकमंत्रीपद स्वीकारले याचा अभिमान वाटतो, असेही शिंदे म्हणाले.
पक्षप्रवेश व मेळाव्व्साठी पूर्व विदर्भ समन्वयक किरण पांडव यांनी पुढाकार घेतला होता. व्यासपीठावर मंत्री संजय राठोड, आमदार कृपाल तुमाने, मनीषा कायंदे, मंगेश काशीकर, सूरज गोजे, मनीषा पापडकर, शुभम नवले, निलेश हेलोंडे आदी उपस्थित होते.
घर तिथे शिवसैनिक
खरी शिवसेना कुणाची हे लोकसभा व विधानसभा निवडणुकीत सिद्ध झाले. राज्यातील जनतेला महायुती न्याय दिल्याखेरीज राहणार नाही. ‘गाव तिथे शाखा, घर तिथे शिवसैनिक, लोकांच्या मनात शिवसेना रुजवायची आहे. विदर्भात महायुती भक्कम झाली पाहिजे. मी खुर्चीसाठी हपापलेलो नाही. सत्ता, पैशाची हाव नाही तर, माणसे शोधतो, जोडतो. आपल्याला शिवसेनेचा डंका वाजवायचा आहे, असे आवाहन उपमुख्यमंत्री एकनाथ शिंदे यांनी केले.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा