मनसेच्या पुरुष आणि महिला विधानसभा अध्यक्षांची एक बैठक अमित ठाकरे यांच्या उपस्थितीत शनिवारी झाली. निवडणुकीतील पराभवानंतर अमित ठाकरे यांनी पहिल्यांदाच या बैठकीच्या निमित्ताने ही कबुली दिली.

जानेवारीच्या शेवटच्या आठवड्यात मनसेचे अध्यक्ष राज ठाकरे यांनी वरळी येथे पक्षाच्या पदाधिकाऱ्यांचा मेळावा आयोजित केला होता. ‘विधानसभा निवडणुकीतील मतदानावर जाऊ नका. लोकांनी आपल्याला मतदान केले आहे. परंतु ते आपल्यापर्यंत पोहोचलेले नाही. मतदान कुठेतरी गायब झाले, असे नमूद करीत राज ठाकरे यांनी विधानसभा निवडणूक निकाल अनाकलनीय असल्याचे मत व्यक्त केले होते. अशा प्रकारे निवडणुका होणार असतील तर त्या न लढवलेल्याच बऱ्या,’ असेही ते म्हणाले होते. त्यांच्या या वक्तव्याचा रोख ईव्हीएम यंत्रणेकडे असल्याचे बोलले जाते. मात्र आता अमित ठाकरे यांनी वेगळीच भूमिका घेतल्याचे दिसते.

निवडणुकीत पक्षाच्या पराभवासाठी ईव्हीएमला दोष देण्याऐवजी अमित ठाकरे यांनी पराभवासाठी आपणच जबाबदार असल्याचे सांगितल्याचे समजते. यावेळी काही पदाधिकाऱ्यांनी ईव्हीएम यंत्रणेस दोष देण्याचा प्रयत्न केला, त्यावर अमित यांनी हे आव्हान दिले. विधानसभा निवडणुकीत मला अतिआत्मविश्वास नडला, मतदारसंघात अवघ्या १५ दिवसांत घरोघरी पोहोचू शकलो नाही, अशी खंतही यावेळी त्यांनी व्यक्त केल्याचे कळते. विधानसभा निवडणुकीतील अपयशाचे खापर एकमेकांवर फोडणाऱ्या विभाग अध्यक्षांनाही अमित यांनी खडे बोल सुनावल्याचे समजते. पदाची जबाबदारी पेलवत नसेल तर पदाचा राजीनामा द्या आणि ज्यांना काम करायचे आहे त्यांना संधी द्या, असे त्यांनी सांगितल्याचे कळते.

पदाधिकाऱ्यांशी संवाद साधणार मी लवकरच विधानसभा मतदारसंघनिहाय दौरा करणार आहे. या दौऱ्याच्या निमित्ताने प्रत्येक पदाधिकाऱ्याशी थेट संवाद साधणार आहे. महापालिका निवडणूक अवघ्या १५ दिवसांवर येऊन ठेपली आहे, या जाणिवेतून आपल्याला कामाला लागायला हवे, असेही त्यांनी सांगितल्याचे कळते.