विशेष म्हणजे देवेंद्र फडणवीस यांनी स्वत: याबाबत माध्यमांना प्रतिक्रिया दिली आहे. आपण आपल्याच मंत्रिमंडळातील मंत्र्यांना याबाबत दम दिल्याचं त्यांनी सांगितलं. तसेच कॅबिनेटचा अजेंडा अशाप्रकारे बाहेर पडणं म्हणजे गुप्त माहिती बाहेर देण्यासारखं आहे. आपण मंत्रिपदाची शपथ घेताना गोपनीयतेची शपथ घेतो. त्यामुळे मंत्र्यांनी असं कृत्य केलं तर गोपनीयतेचा भंग होतो. असं कृत्य केल्यास योग्य ती कारवाई केली जाईल, असा इशारा देवेंद्र फडणवीस यांनी मंत्र्यांना दिला. याबाबत देवेंद्र फडणवीस यांनी स्वत: माध्यमांना माहितीदेखील दिली.

देवेंद्र फडणवीस काय म्हणाले?

मंत्रिमंडळ बैठक होण्याआधीच काही लोकं अजेंडा छापत आहेत. ही चुकीची पद्धत आहे. मी मंत्र्यांना देखील सांगितलं आहे की, आपल्या कार्यालयांना सांगा. अन्यथा मला कारवाई करावी लागेल. कॅबिनेटचा अजेंडा हा पूर्णपणे गुप्त असतो. त्याचीच शपथ आपण घेतलेली आहे. त्यामुळे आपल्याला देखील माझी विनंती आहे जी माध्यमं कॅबिनेटच्या आधी कॅबिनेटचा अजेंडा दाखवत आहेत. कृपया आपल्या टीआरपी किंवा पेपरच्या खपाकरता अशाप्रकारे नियम मोडू नका

शिंदे-फडणवीस यांच्यात शीतयुद्ध?

दरम्यान, राज्याच्या राजकारणात सध्या मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात शीतयुद्ध सुरु असल्याची चर्चा आहे. एकनाथ शिंदे आणि देवेंद्र फडणवीस यांच्यात मतभेदाच्या अनेक घटना आतापर्यंत समोर आल्या आहेत. एकनाथ शिंदे यांच्या शिवसनेचे नेते प्रताप सरनाईक हे परिवहन मंत्री असताना एसची महामंडळात प्रशासकीय नियुक्ती फडणवीसांनी केली. तसेच शिवसेनेच्या नेत्यांच्या सुरक्षेत कपात करण्याचा निर्णय घेण्यात आला. तसेच रायगड आणि नाशिक जिल्ह्यांच्या पालकमंत्रीपदाचा तिढा सुटताना दिसत नाही.
एकनाथ शिंदे आणि देवेंद्र फडणवीस यांच्यात शितयुद्ध, राज्याच्या राजकारणाचा नवा अंक, वाचा A टू Z
आपत्ती व्यवस्थापन समितीत आधी शिंदेंचं नाव वगळलं होतं. नंतर वाद निर्माण झाल्यानंतर नियम बदलून शिंदेंचं नाव समाविष्ट करण्यात आलं. तसेच मुख्यमंत्र्याचं वैद्यकीय सहाय्यता कक्ष असताना एकनाथ शिंदे यांनी उपमुख्यमंत्री वैद्यकीय सहाय्यता कक्षाची घोषणा केली आहे. या अशा अनेक घडामोडींमुळे दोन्ही नेत्यांमध्ये शीतयुद्ध सुरु असल्याची चर्चा आहे.