Pune Kothrud Pig Death Case: कोथरूड परिसरात दोन डुकरांचा सोमवारी मृत्यू झाला. कोथरूडमध्ये सहा फेब्रुवारीपासून ५४ डुकरांचा मृत्यू झाला आहे. यापैकी एका डुकराच्या शरीरात कार्बामेट हा रासायनिक घटक आढळला आहे.
या संदर्भातील अहवाल पशुसंवर्धन विभागाने महानगरपालिकेच्या पशुवैद्यकीय विभागाला पाठवला आहे. भोपाळ येथील राष्ट्रीय पशुवैद्यकीय प्रयोगशाळेचा अहवाल आल्यानंतर डुकरांच्या मृत्यूचे गूढ उकलणार आहे. कीटकनाशक द्रव्यांमध्ये कार्बामेट हा रासायनिक घटक असतो.
कोथरूड परिसरातील भारतीनगर, भिमाले टॉवर; तसेच परिसरातील नाला येथे गेल्या काही दिवसांत रोज डुकरांचा मृत्यू होत आहे. सहा फेब्रुवारीपासून सोमवारपर्यंत ५४ डुकरांचा मृत्यू झाला आहे. या परिसरातील १७१ डुकरे विलगीकरणात ठेवण्यात आली आहेत. काही डुकरांचे रक्तनमुने तपासले असून, ते ‘निगेटिव्ह’ आले होते.
दिल्लीचा मुख्यमंत्री कोण? उद्याच्या बैठकीत होणार घोषणा, ‘या’ नावांची जोरदार चर्चा
अहवालातून कळेल कारण
मागील आठवड्यात राज्य पशुसंवर्धन विभाग आणि महापालिका अधिकाऱ्यांच्या पथकाने घटनास्थळी जाऊन पाहणी केली. एका डुकराचे तेथेच शवविच्छेदन करण्यात आले. त्यात काविळीची लक्षणे आढळली. या डुकराच्या शरीरात आता कार्बामेट हा रासायनिक घटक आढळला आहे. हा घटक डुकराच्या शरीरात कसा गेला, याचा शोध महापालिकेच्या वैद्यकीय पशुवैद्यकीय विभागाकडून घेतला जात आहे. या डुकराच्या शवविच्छेदनाचे नमुने भोपाळ येथील पशुवैद्यकीय प्रयोगशाळेत पाठवले असून, या अहवालातूनच नेमके कारण स्पष्ट होणार आहे.
कोथरूडमध्ये सहा फेब्रुवारीपासून ५४ डुकरांचा मृत्यू झाला आहे. यापैकी एका डुकराच्या शरीरात कार्बामेट रासायनिक घटक आढळला आहे. औषध फवारणी करताना कार्बामेट रासायनिक घटक डुकराच्या शरीरात गेला असावा. या संदर्भातील अहवाल पशुसंवर्धन विभागाने महापालिकेच्या पशुवैद्यकीय विभागाला पाठवला आहे. – डॉ. बाळासाहेब गायकवाड, सहायक आयुक्त, राज्य पशुसंवर्धन विभाग
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाइनमध्ये कन्सल्टंट म्हणून कार्यरत असून पत्रकारितेमध्ये पदव्युत्तर शिक्षण पूर्ण केले आहे. ऑनलाइन माध्यमांमध्ये फ्रीलान्सिंगचा २ वर्षांचा अनुभव आहे आणि आता मटा ऑनलाइनमध्ये आहे. जनरल बातम्यासोबतच गुन्हेगारीविषयक बातम्यांमध्ये रस.… आणखी वाचा