अग्निसुरक्षा विभागाने २०२४ मध्ये काम थांबवण्याची दिलेली नोटीस

एशियन फायर वर्क्स या कंपनीला फायर आडिटमध्ये मागच्या वर्षीच परवानगी नाकारण्यात आली होती, तरी या कंपनीत बारुद आणि फटाके तयार केले जात होते, असं महसूलमंत्री चंदेरशेखर बावनकुळे यांनी सांगितलं आहे. या कंपनीचा मालक सोहेल अमीन आणि मॅनेजर सध्या फरार असून त्यांचा शोध घेतला जात असल्याचंही महसूलमंत्री चंद्रशेखर बाननकुळे यांनी सांगितलं आहे. बावनकुळे म्हणाले की, अग्निसुरक्षा विभागाने १ जुलै २०२४ रोजी काम थांबवण्याचे आदेश दिले होते. मात्र असं असतानाही इथे काम सुरू झालं होतं. आम्ही या प्रकरणाचा तपास सुरू केला असून तो दोन दिवसांत पूर्ण करून दोषी आढळल्यास त्यांच्यावर कडक कारवाई केली जाईल.

या भेटीदरम्यान बावनकुळे यांनी कारखान्यातील कामगार आणि पीडितांच्या कुटुंबीयांचीही भेट घेतली. यावेळी बावनकुळे यांनी कामगारांचं म्हणणं ऐकून घेत सर्वांना न्याय देण्याचं आश्वासन दिलं. यासोबतच अपघातातील मृत आणि जखमींना शासनाकडून आर्थिक मदत देण्याबाबतही त्यांनी सांगितलं.