सरकारकडे निधीची मागणी करा

मराठवाडा वॉटर ग्रीड योजना आणि विभागातील इतर सिंचन प्रकल्प पूर्ण करण्यासाठी काम सुरू आहे, अशी माहिती जलसंपदा अधिकाऱ्यांनी बैठकीत दिली. सिंचन प्रकल्पांची माहिती आणि अडचणी जाणून घेत रखडलेली कामे तातडीने पूर्ण करण्याची सूचना अंबादास दानवे यांनी केली. या योजनांसाठी सरकारकडे निधीची मागणी करा, असे दानवे यांनी सांगितले.

सरकारने घोषणा केलेले प्रकल्प रखडले

मराठवाडा विभागात जलसंपदा विभागाच्या माध्यमातून सुरू असलेल्या सिंचन प्रकल्पांचा आमदार अंबादास दानवे यांनी सोमवारी आढावा घेतला. या बैठकीला गोदावरी मराठवाडा पाटबंधारे विकास महामंडळाचे कार्यकारी संचालक जयंत गवळी यांच्यासह वरिष्ठ अधिकारी उपस्थित होते. मराठवाड्यासाठी राज्य सरकारने १६ सप्टेंबर २०२३ रोजी घेतलेल्या मंत्रिमंडळ बैठकीतील निर्णयांचा दानवे यांनी आढावा घेतला. सरकारने घोषणा केलेले प्रकल्प रखडले आहेत.

चर्चा करण्यात आली

मराठवाडा वॉटर ग्रीड योजना आणि सिंचन प्रकल्पांच्या प्रगतीबाबत चर्चा करण्यात आली. प्रकल्पनिहाय व जिल्हानिहाय प्रगती, निधी वितरण व खर्च, पूर्ण व सुरू असलेल्या कामांची सद्यस्थिती दानवे यांनी जाणून घेतली. सिंचन योजनांतील अडचणी व उपाययोजना, तसेच पुढील कालावधीतील नियोजनाबाबत संबंधित अधिकाऱ्यांकडून माहिती घेण्यात आली.

Nashik News: नाशिकच्या भूकंप लहरी आता दिल्लीत जाणवणार ; भूकंपप्रवण भागात निरीक्षण यंत्रणा उभारणार

कामे तातडीने पूर्ण करण्याची सूचना

पैठण तालुक्यातील ब्रह्मगव्हाण उपसा सिंचन योजनेच्या आठव्या टप्प्यावर चर्चा झाली. ही योजना पूर्ण क्षमतेने कार्यान्वित झाली नसल्याने परिसरातील गावांचा सिंचनाचा प्रश्न कायम आहे. या प्रकल्पाच्या सद्यस्थितीची माहिती देण्यात आली. जायकवाडी धरण, शिवना-टाकळी धरण, नांदूर मध्यमेश्वर कालवा, शनिदेव उच्चपातळी बंधारा यासह पूरनियंत्रण उपाययोजनांचा आढावा घेतल्यानंतर प्रलंबित कामे तातडीने पूर्ण करण्याची सूचना दानवे यांनी केली.

बंधाऱ्यांच्या दुरुस्तीसाठी अद्यापही आवश्यक निधी उपलब्ध झाला नाही. काही बंधाऱ्यांची दुरुस्ती जलसंपदा विभागाच्या देखभाल-दुरुस्ती निधीतून करण्यात आली असली, तरी बहुतांश बंधारे निधीअभावी नादुरुस्त आहेत. त्यामुळे पावसाळ्यात धोका असल्याची शक्यता व्यक्त करण्यात आली.

Mumbai Police Scam: मुंबई पोलिस दलात मोठा घोटाळा; तब्बल साडेसहा कोटींवर डल्ला, पाच जणांविरुद्ध गुन्हा, प्रकरण काय?

तातडीने निधी देण्यासाठी शासनाकडे मागणी करण्यात यावी

या कामांसाठी तातडीने निधी देण्यासाठी शासनाकडे मागणी करण्यात यावी, असे दानवे म्हणाले. मिटमिटा परिसरात महापालिकेचा पाणीपुरवठा नसल्याने पडेगाव तलावातून नागरिकांना पाणीपुरवठा करण्यात यावा, अशी मागणी नगरसेवक गणेश लोखंडे यांनी केली.