राज्यात २०१९ पूर्वीच्या सर्व वाहनांना ‘एचएसआरपी’ बसविणे सर्वोच्च न्यायालयाच्या आदेशानंतर बंधनकारक करण्यात आले आहे. त्यामुळे पुण्यात २५ लाखांपेक्षा जास्त वाहनांना ही नंबरप्लेट बसवावी लागणार आहे. त्यासाठी एका कंपनीला काम देण्यात आले असून, ही नंबरप्लेट बसविण्यास सुरुवात झाली आहे; पण वाहनचालकांना म्हणावा असा प्रतिसाद अद्याप मिळत नाही.

आतापर्यंत सात ते आठ हजार वाहनांना ही नंबरप्लेट बसविण्यात आली आहे. तेवढ्याच वाहनांचे नंबरप्लेट बसविण्यासाठी अर्ज आले आहेत. त्यामुळे ३१ मार्चपर्यंत एवढ्या मोठ्या प्रमाणात वाहनांना ही नंबरप्लेट बसविणे शक्य नाही. त्यामुळे परिवहन विभागाने ही नंबरप्लेट बसविण्यासाठी मुदतवाढ द्यावी, अशी मागणी केली जात होती.

त्यानुसार परिवहन विभागाने ३० एप्रिलपर्यंत नंबरप्लेट बसविण्यासाठी मुदतवाढ देण्याचा निर्णय घेतला आहे. याबाबतचे आदेश सर्व प्रादेशिक परिवहन कार्यालयांना देण्यात आले आहेत.

पुण्यात ६९ केंद्रे

दरम्यान, पुण्यात वाहनांची संख्या अधिक असल्याने पुण्यात ‘एचएसआरपी’ बसविण्यासाठी ६९ केंद्रे स्थापन केली आहेत. रोझमां सेफ्टी सिस्टीम लि.’ या कंपनीला हे काम दिले असून https://mhhsrp.com या लिंकवर ऑनलाइन नोंदणी करता येणार आहे. आतापर्यंत या लिंकवर दहा हजारांहून जास्त अर्ज आले आहेत. जानेवारीपासून नंबरप्लेट बसवण्याच्या कामास सुरुवात झाली आहे.
Shiv Jayanti : छत्रपती शिवरायांच्या ३९५ व्या जयंतीचा उत्साह, किल्ले शिवनेरीवर हिंदवी स्वराज्य महोत्सव रंगणार

‘एचएसआरपी’ आवश्यक का?

वाहनाच्या सुरक्षेसाठी आणि सोयीसाठी या नंबरप्लेट तयार केल्या आहेत. ही प्लेट होलोग्राम स्टिकरसह येते. त्यावर इंजिन आणि चेसिस क्रमांक लिहिला असतो. हा नंबर प्रेशर मशिनद्वारे लिहिला जातो. याचे सर्वांत मोठे वैशिष्ट्य म्हणजे, ती एकदा तुटल्यावर पुन्हा जोडता येत नाही. ही प्लेट वेगळ्या पद्धतीने बनवली जाते आणि कुणीही कॉपी करून बनावट प्लेट बनवू शकत नाही. तिची चोरी आणि गैरवापर करता येत नाही. एखाद्या वाहनाला अपघात झाला, तर गाडीला लावलेली ‘हाय सिक्युरिटी नंबरप्लेट’ वाहन मालकासह सर्व माहिती देते.
Ladki Bahin : लाडकी बहीण लाभार्थ्यांना आणखी एक गाळणी, २.६३ लाख महिला कात्रीत, फेब्रुवारीचा हप्ता कधी?

नंबर प्लेटसाठीचे शुल्क किती?

दुचाकी, ट्रॅक्टर – ४५०
तीनचाकी – ५००
चारचाकी व अन्य – ७४५