नवी मुंबईत एका सातवी शिक्षित व्यक्तीने २१ गुंतवणूकदारांकडून २७ लाख ६५ हजार रुपये उकळले. जास्त परतावा देण्याचे प्रलोभन दाखवून त्याने ही रक्कम घेतली होती आणि विदेशात पळून जाण्याच्या तयारीत होता. पोलिसांनी त्याला अटक केली आहे.
भोलाकुमार चौधरी (३३) असे त्याचे नाव असून, तो सांताक्रुज भागात वास्तव्यास होता. चौधरीने जुलै २०२४मध्ये मुकेश कक्कड या मित्रासोबत वाशी सेक्टर-१७मधील महावीर सेंटरमध्ये ‘बोल्टकॅब मॅनेजमेंट प्रायव्हेट लिमिटेड’ नावाची कपंनी सुरू केली. तसेच, अवाजवी लाभ देणाऱ्या योजना आणून गुंतवणूकदारांना जास्त परतावा देण्याचे प्रलोभन दाखवले. त्याला बळी पडून सहा महिन्यांमध्ये अनेक गुंतवणूकदारांनी त्याच्या कंपनीत लाखो रुपयांची गुंतवणूक केली. चौधरीने सुरुवातीला गुंतवणूकदारांना दरमहा नऊ टक्के दराने तीन महिने परतावादेखील दिला.
चौधरी हा फसवणुकीच्या उद्देशाने गुंतवणूकदारांना जास्त परताव्याचे प्रलोभन दाखवून गुंतवणुकीसाठी प्रवृत्त करत असल्याची माहिती गुन्हे शाखा कक्ष-१ला मिळाली. त्यानुसार शाखेने त्याच्या कंपनीत डमी गुंतवणूकदार पाठवून पडताळणी केली असता, त्यात तथ्यता आढळली. त्यामुळे गुन्हे शाखेने चौधरीविरोधात वाशी पोलिस ठाण्यात गुन्हा दाखल करून त्याला अटक केली.
विविध योजनांद्वारे प्रलोभन
गुंतवणूकदारांनी आणखी गुंतवणूकदार आणल्यास त्यांना गुंतवणुकीच्या रक्कमेवर पाच टक्के कमिशन, एखादया गुंतवणूकदाराने तीन लाखांची गुंतवणूक आणल्यास थायलंड येथे पर्यटनाची संधी, सहा लाख रुपयांची गुंतवणूक आणल्यास दरमहा १० हजार रुपये याप्रमाणे सहा महिने रॉयल्टी म्हणून ६० हजार रुपये, आठ लाखांची गुंतवणूक आणल्यास आयफोन-१६ देण्याचे प्रलोभन चौधरीने दाखवले होते.
भोलाकुमार चौधरी याचे फक्त सातवीपर्यंत शिक्षण झाले आहे. बोल्टबॅक मॅनेजमेंट कंपनीच्या नावाने इेलक्ट्रिक पॅसेंजर कार विकत घेऊन ओला-उबरप्रमाणे कंपनी सुरू करणार असल्याचे त्याने गुंतवणूकदारांना सांगितले होते. त्यासाठी त्याने अनेकांकडून अगाऊ स्वरूपात मोठ्या प्रमाणात रोख रक्कम घेतली होती. त्याचे कारस्थान वेळीच उघड झाल्याने गुन्हे शाखेने त्याच्या मुसक्या आवळल्या.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा