या गोळीबार प्रकरणात रिंदा कनेक्शनचा संशय असल्याने या प्रकरणाचा तपास एटीएसकडे वर्ग करण्यात आला आहे. मनप्रीतसिंघ उर्फ मन्नु गुरुबक्षसिंघ ढिल्लो (वय ३१ रा. शहीदपूरा, नांदेड) आणि हरप्रितसिंघ उर्फ हॅप्पी बाबुसिंघ कारपेंटर (वय २५ रा. शहीदपूरा, नांदेड) असे अटक करण्यात आलेल्या संशयितांची नावे आहेत.

सविस्तर वृत्त असे की, १० फेब्रुवारीला सकाळी साडेनऊच्या सुमारास गुरुद्वारा गेट नंबर ६ येथे गोळीबाराची घटना घडली होती. खुनाच्या गुन्ह्यात पॅरोलवर बाहेर आलेल्या गुरमितसिंघ सेवादार आणि त्याचा मित्र रविंद्रसिंघ राठोड याच्यावर एका हल्लेखोराने बेछूट गोळीबार केला. हल्लेखोराने गुरमितसिंघ सेवादार याच्या आठ गोळया झाडल्या, त्यातील चार गोळया आरपार निघून स्कुटी चालवणाऱ्या रविंद्रसिंघ राठोड याला दोन गोळया लागल्या. घटनेनंतर गुरमितसिंघ सेवादार व रविंद्रसिंघ राठोड हे दोघेही गंभीर जखमी झाले होते. तर रविंद्रसिंघ राठोड याचा रुग्णालयात उपचारादरम्यान मृत्यू झाला. गोळीबाराच्या घटनेनंतर हल्लेखोर हा दुचाकी घेऊन फरार झाला.

घटनेच्या काही तासानंतर संशयित आरोपी मनप्रीतसिंघ उर्फ मन्नु ढिल्लो याने वजिराबाद पोलीस ठाणे गाठत दुचाकी चोरी झाल्याची माहिती दिली. पोलिसांनी गुरुद्वारा परिसरातील सीसीटीव्ही फुटेज तपासल्यानंतर आरोपी मनप्रीतसिंघ हा हल्लेखोरासोबत चारचाकी आणि दुचाकी रेकी केल्याचे उघड झाले. शिवाय घटनेच्या काही तासांपूर्वी हल्लेखोराला त्याने दुचाकी दिल्याचे सीसीटीव्ही मध्ये कैद झाले. पोलिसांनी आरोपीला मदत करणाऱ्या दोन्ही संशयितांना अटक केली आहे. विशेष म्हणजे हल्लेखोर हा इतर राज्यातील रहिवासी असून तो चार ते पाच दिवस नांदेडला राहत होता अशी माहिती आहे. हल्लेखोराने वसमत येथे गुरमीतसिंघ मारण्याचा डाव आखला होता, मात्र हा डाव अयशस्वी झाला.

गोळीबारातील जखमी गुरमीतसिंघ सेवादार याने आपल्या साथीदारासह २०१६ साली मोस्ट वान्टेड दहशतवादी हरविंदरसिंघ संधू उर्फ रिंदा याच्या भावाचा खून केला होता. बऱ्याच वर्षानंतर तो पॅरोलवर बाहेर आला. भावाचा बदला घेण्यासाठी रिंदाने शार्प शूटरच्या माध्यमातून हे कृत्य केल्याचा पोलिसांना संशय आहे. त्यामुळे या प्रकरणाचा तपास एटीएसकडे सोपवण्यात आला आहे.