अंबरनाथ तालुक्यातील मलंगगडावर आज (१२ फेब्रु.) उपमुख्यमंत्री एकनाथ शिंदे आरती करणार आहेत. दरवर्षी माघ पौर्णिमेला शिंदे या गडावर मलंग मच्छिंद्रनाथांची आरती करतात. मलंगगड हे हिंदूंचं स्थान आहे की मुस्लिमांचं यावरून १९५२ सालापासून न्यायालयात वाद प्रलंबित आहे. हे मलंग मच्छिंद्रनाथ यांचं मंदिर असल्याची हिंदूंची धारणा आहे, तर हा हाजीमलंग शाह बाबांचा दर्गा असल्याची मुस्लिमांची धारणा आहे. सद्यस्थितीत दोन्ही धर्मांचे भाविक गडावर जाऊन दर्शन घेतात. मात्र मलंगगडाला मुक्ती मिळवून देण्याची घोषणा करत शिवसेनेचे तत्कालीन जिल्हाप्रमुख आनंद दिघे यांनी प्रत्येक माघ पौर्णिमेला मलंगगडावर जाऊन आरती करण्यास सुरुवात केली. ही प्रथा एकनाथ शिंदेंकडून आजही पाळली जातेय. दरम्यान, राममंदिराचा ५०० वर्षांचा प्रश्न सुटला, तसा मलंगगडाचाही प्रश्न सुटेल, असा विश्वास कल्याण ग्रामीणचे शिवसेनेचे आमदार राजेश मोरे यांनी व्यक्त केलाय.