अर्थसंकल्पातून महाराष्ट्राच्या वाट्याला काय आलं, कोणत्या प्रकल्पांना किती निधी मिळाला, याची आकडेवारी उपमुख्यमंत्री अजित पवारांनी दुपारी ३ वाजून ५ मिनिटांनी प्रसिद्ध केली. त्यांनी त्यासाठी एक ट्विट केलं. यानंतर मुख्यमंत्री देवेंद्र फडणवीस यांनी ४ वाजून ५१ मिनिटांनी ट्विट केलं. या दोन्ही ट्विटमधील अनेक प्रकल्पांसाठीची आकडेवारी जुळत नाही. दोन नेत्यांनी प्रसिद्ध केलेल्या आकडेवारीत मोठी तफावत आहे. त्यामुळे खरी आकडेवारी कोणाची, असा प्रश्न निर्माण झाला आहे.
एमयुटीपी प्रकल्पांसाठी केंद्रीय अर्थसंकल्पात १४६५ कोटी ३३ लाख रुपयांची तरतूद करण्यात आल्याची माहिती उपमुख्यमंत्री अजित पवारांनी दिली आहे. तर मुख्यमंत्र्यांनी केलेल्या ट्विटमध्ये एमयुटीपी प्रकल्पांसाठी ५११ कोटी ४८ लाख रुपयांच्या निधीची तरतूद असल्याचा उल्लेख आहे. दोन्ही नेत्यांनी दिलेल्या आकडेवारीतील तफावत मोठी आहे.

मुंबई मेट्रोसाठी केंद्रानं १ हजार ६३७ कोटी रुपयांचा निधी दिल्याचं अजित पवारांनी ट्विटमधून सांगितलं आहे. तर फडणवीसांच्या ट्विटमध्ये मुंबई मेट्रोसाठी केंद्रानं १ हजार २५५ कोटी रुपयांची तरतूद केल्याचा उल्लेख आहे. पुणे मेट्रोसाठी केंद्रानं ८३७ कोटी रुपयांचा निधी दिल्याची माहिती अजित पवारांनी दिली आहे. तर याच प्रकल्पाच्या निधीबद्दल फडणवीसांनी दिलेला आकडेवारी वेगळा आहे. पुणे मेट्रोसाठी केंद्रीय बजेटमध्ये ६९९ कोटी रुपयांची तरतूद असल्याचा उल्लेख फडणवीसांच्या ट्विटमध्ये आहे.

इंटिग्रेटेड ग्रीन अर्बन मोबिलिटी प्रकल्पासाठी केंद्रीय अर्थसंकल्पात ६५२ कोटी ५२ लाख रुपयांची तरतूद केल्याचा उल्लेख अजित पवारांच्या ट्विटमध्ये करण्यात आलेला आहे. पण फडणवीसांनी दिलेली आकडेवारी वेगळी आहे. इंटिग्रेटेड ग्रीन अर्बन मोबिलिटी प्रकल्पासाठी केंद्रानं ७९२ कोटी लाखांचा निधी दिल्याचं फडणवीसांनी सोशल मीडियावर सांगितलं आहे. त्यामुळे मुख्यमंत्र्यांनी दिलेली माहिती खरी की उपमुख्यमंत्र्यांनी दिलेली आकडेवारी खरी, असा प्रश्न निर्माण झाला आहे.