माहुरची रेणुका माता केंद्रीय मंत्री नितीन गडकरी यांचे कुलदैवत आहे. नांदेड जिल्ह्यातील या तीर्थस्थळाच्या विकासावर गडकरी यांचे विशेष लक्ष असते. गडावर चढून जाताना वृद्ध आणि दिव्यांग भाविकांना त्रास होत असल्याची बाब हेरून त्यांनी स्काय वॉकला मंजुरी दिली. सध्या श्री रेणुका माता मंदिरात जाण्यासाठी २४० पायऱ्या चढाव्या लागतात. स्काय वॉक तयार झाल्यानंतर पायऱ्या चढण्याची गरज भासणार नाही. या प्रकल्पामुळे रेणुका मातेचे दर्शन अधिक सोपे होणार आहे. वृद्ध आणि दिव्यांगांसाठी हे वरदान ठरणार आहे. या प्रकल्पाचे २० मे २०२३ रोजी गडकरी यांच्याहस्ते भूमिपूजन झाले. साधारणत: दीड वर्षे या कामाला लागणार असल्याने गडकरी यांनी कानउघाडणी केली.

‘आम्ही दिल्ली-मुंबई महामार्गाचे एक लाख कोटींचे काम दोन वर्षांत पूर्ण केले. मग ५१ कोटींच्या कामाला अठरा महिने कसे म्हणत एक वर्षात काम पूर्ण करा. दिरंगाई झाल्यास रगडल्याशिवाय राहणार नाही,’ अशी तंबीही त्यांनी जाहीर भाषणातून कंत्राटदाराला दिली. पण भूमिपूजन होऊन आता दीड वर्षांचा कालावधी लोटला आहे. गेल्या सहा महिन्यांपासून भूमिगत पाण्याच्या टाकीचे काम सुरू आहे. शंभर फुट लांबीच्या संरक्षक भिंतीचे काम रखडत पूर्ण झाले. ५८ पिलर्सच्या कामाची गती संथ आहे. सार्वजनिक बांधकाम विभागाचे अधिकारी कामाची पाहणी करण्यासाठी अधूनमधून येत असल्याचा तेवढाच दिलासा आहे.

प्रकल्पाविषयी…
■ मंदिरापर्यंत पोहोचण्यासाठी चार कॅप्सूल लिफ्ट राहणार.
■ भाविकांना टेकडीच्या पायथ्याशी असलेल्या स्थानकावरून थेट मंदिरात जाता येईल.
■ टेकडीच्या माथ्यावरील मंदिराजवळ असलेल्या स्थानकावर पोहोचता येईल.
■ प्रत्येक लिफ्टमध्ये २० याप्रमाणे चारमधून ८० भाविक जाऊ शकणार. परवानग्यांचा प्रवास…
■ ३१ मे २०२३ : प्रकल्पाला अंतिम परवानगी मिळाली.
■ ३० नोव्हेंबर २०२३: वनविभागाच्या जमिनीवर प्रत्यक्षात काम करण्याची परवानगी दिली गेली.
■ १५ डिसेंबर २०२३ : जागा हस्तांतरण करण्यात आली.
■ १ फेब्रुवारी २०२४ : प्रकल्पाच्या पायव्याच्या कामास सुरुवात.

माहूर हे साडेतीन शक्तिपीठांपैकी पूर्ण पीठ आहे. याठिकाणी रेणुका मातेचे पुरातन मंदिर आहे. केंद्रीय मंत्री नितीन गडकरी यांचे सर्व कुटुंब देवीचे निस्सीम भक्त आहे. त्यांच्यामुळेच भाविकांच्या सुविधेसाठी लिफ्टसह स्काय वॉकला मंजुरी मिळाली. पण, कंत्राटदार अत्यंत संथगतीने काम करीत आहे. – फिरोज दोसाणी, माहूरचे नगराध्यक्ष