निलेश एकनाथ शेवाळे (वय ५२) असे या एसटी बस चालकाचे नाव असल्याची माहिती आहे. निलेश शेवाळे हे गुरुवारी (३० जानेवारी) बस घेऊन मुरुम येथून पुण्याच्या दिशेने निघाले होते. यावेळी सकाळी ७.३० च्या सुमारास एसटी बस जेजुरी बस थानकात आली आणि चालक निलेश शेवाळे यांना हृदयविकाराचा तीव्र झटका आला. त्यातच ते आगारात बेशुध्द पडले. हे पाहून परिसरात एकच खळबळ माजली. जेजुरी आगारातील इतर कर्मचाऱ्यांनी त्यांना तात्काळ जेजुरीच्या ग्रामीण रुग्णालयात उपचारासाठी दाखल केले. मात्र, तोपर्यंत खूप उशीर झालेला होता. रुग्णालयात डॉक्टरांनी त्यांन तपासून मृत घोषित केले.

दरम्यान, एसटीबस मध्ये काही प्रवाशी देखील होते. बस जेजुरी आगारात आल्यानंतर या चालकाला हृदयविकाराचा धक्का आला, जर बस चालवत असताना असं झालं असतं तर कदाचित मोठी दुर्घटना घडू शकली असती अशी चर्चा प्रवाशांमध्ये सुरु होती. मात्र, बस चालकासोबत ही दुर्दैवी घटना घडल्याने साऱ्यांमधून हळहळ व्यक्त केली जात होती.

याबाबत बारामती आगाराचे आगार व्यवस्थापक रविराज घोगरे यांनी सांगितले की, जेजुरी बस स्थानकात एसटी बस थांबल्यावर निलेश शेवाळे यांना त्रास जाणवला. शेवाळे यांनी याबाबत त्यांच्या सहकाऱ्यांना सांगितलं आणि तेवढ्यात ते बेशुध्द झाले. त्यांना तेथील ग्रामीण रुग्णालयात उपचारासाठी दाखल करण्यात आले होते. मात्र, त्यांचे निधन झाल्याचे डाॅक्टरांनी सांगितले. शेवाळे यांच्यावर त्यांच्या निरा या गावी अंत्यसंस्कार करण्यात आल्याचे घोगरे यांनी सांगितले.