नवी मुंबई बेलापूर येथील राहणारे ऍडव्होकेट सचिन सोनावळे हे आपल्या खासगी डस्टर या चारचाकी वाहनातून माथेरान फिरण्यासाठी म्हणून प्रेयसी सोबत आले होते. नेरळ येथून माथेरान घाट चढत असताना गारबट येथील रस्त्याच्या चढावावर अचानक कारच्या पुढील इंजिन बाजूने धूर निघायला लागला. आणि क्षणार्धात आगीने पेट घेतला. दरम्यान वाहन चालवणारे ऍड. सोनवणे यांनी लागलीच हुशारी दाखवत रस्त्याच्या कडेला कार पार्क करून दोघे बाहेर पडले. यावेळी जीव मुठीत घेवून पळणारे सोनवणे हे रस्त्यावर पडल्याने त्यांच्या हाताला दुखापत झाली. तर स्थानिक वाहन चालक नागरिकांनी यावेळी धाव घेत त्यांना बाजूला करीत त्यांचे प्राण वाचविले आहे.

माथेरान नगरपालिकेची असणारी अग्निशमन वाहनास स्थानिकांनी पाचारण केले असता, वाहन चालवण्यासाठी हक्काचा नियोजित चालकच नसल्याची धक्कादायक बाब समोर आली आहे. दरम्यान माथेरान घाटात आज (२४ जानेवारी) सकाळी दहा वाजण्याच्या सुमारास बर्निंग कारचा थरार घडल्यामुळे तब्बल दीड तास वाहतूक सेवा बंद पडून वाहनांची कोंडी झाली होती. उपस्थित नेरळ पोलिसांनी पर्यटकांच्या सुरक्षितेसाठी घाटातील दोन्ही बाजूची वाहतूक रोखून ठेवल्यामुळे घाटात दोन्ही बाजूस वाहनांच्या लांबच लांब रांगा दिसून येत होत्या.

माथेरान फिरण्यासाठी आलेल्या पर्यटकांनी वाहनातून उतरून बर्निंग कारचा थरार पाहण्यासाठी रस्त्यावर एकाच गर्दी केली होती. वाहनाला लागलेली आग शांत झाल्यावर पोलिसांनी येथील एकेरी वाहतूक सुरू करत घाटातील वाहतूक कोंडी मोकळी केली आहे. दरम्यान माथेरान अग्निशमन वाहनास तात्पुरता चालक मिळाल्यावर दोन तासानंतर हे वाहन घटनास्थळी दाखल झाले होते. मात्र तोपर्यंत कार जळून खाक झाली होती.