रायगडचं पालकमंत्रिपद राष्ट्रवादीच्या अदिती तटकरेंना देण्यात आलं आहे. त्यानंतर शिवसैनिकांनी आक्रमक भूमिका घेतली आहे. पालकमंत्रिपद सेनेच्या भरत गोगावलेंना मिळावं अशी शिवसैनिकांसह जिल्ह्यातील सेनेच्या अन्य आमदारांचीदेखील मागणी आहे. रायगडमधील शिवसैनिक आज मुंबईत आले होते. त्यांनी मुक्तागिरी बंगला गाठत गोगावलेंसमोर आपल्या भावना मांडल्या. उपमुख्यमंत्री आणि शिवसेनेचे मुख्य नेते एकनाथ शिंदे यांच्या भेटीसाठी शिवसैनिक रायगडहून आले होते.
शिंदेंचे ‘ते’ ३ निर्णय फडणवीसांनी फिरवले अन् संबंध बिघडले; नाराजी नाट्यामागची इनसाईड स्टोरी
पालकमंत्रिपद राष्ट्रवादीकडे गेल्यानं रायगडमधील शिवसैनिकांनी मुंबई-गोवा महामार्गावर टायर जाळले. त्यावर भाष्य करताना राष्ट्रवादीचे खासदार आणि अदिती तटकरेंचे वडील सुनील तटकरेंनी आम्ही सुसंस्कृत आहोत असं म्हणत गोगावलेंसह शिवसेना आमदारांना टोला लगावला. त्याचा समाचार गोगावलेंनी आज घेतला. तटकरेंनी जरा अंतरंगात डोकावून पाहावं. मग त्यांना ते किती सुसंस्कृत आहेत या प्रश्नाचं उत्तर मिळेल, असा खोचक टोला गोगावलेंनी लगावला.

‘लोकसभा निवडणुकीत तटकरेंनी आमच्याकडे मदत मागितली होती. आम्ही त्यांना तन, मन, धनानं साथ दिली. राष्ट्रवादीला राज्यात केवळ एक जागा जिंकता आली. आम्ही रायगडचा किल्ला राखला. त्यावेळी महेंद्र दळवी, रवीशेठ पाटील, योगेश कदम यांच्यासह मीदेखील तटकरेंचं काम प्रामाणिकपणे केलं,’ याची आठवण गोगावलेंनी करुन दिली.
दादांनी स्वत:पुरतं, तटकरेंनी लेकीपुरतं पाहिलं! NCPमध्ये मोठी खदखद; मंत्री नाराज, कारण काय?
‘लोकसभेला आम्ही तटकरेंना सहकार्य केलं. पण विधानसभेला त्यांनी आमच्याविरोधात फिल्डींग लावली. प्रत्येक मतदारसंघात त्यांची वेगळी गणितं होती. महेंद्र थोरवेंच्या कर्जत मतदारसंघात वेगळी तडतोड होती. तिथे थोरवेला पाडा. आम्हाला मदत करा, अशी भूमिका होती. अलिबागमध्ये महेंद्र दळवीला आम्ही पाडतो आणि तुम्हाला मदत करतो, अशी तडजोड होती. मलाही पाडण्याचा डाव होता. कारण मी पालकमंत्री होण्याची शक्यता होती,’ असं म्हणत गोगावलेंनी तटकरेंवर गंभीर आरोप केले.