सोसायटीमध्ये अवैधरित्या मोटारपंप बसवला

पालघर शहरातील टेंभोडे परिसरात श्रीपती सोसायटी असून या सोसायटीत नगरपरिषदेमार्फत देखील पाणीपुरवठा करण्यात येतो. या पाणीपुरवठ्यातील पाण्याचा फोर्स वाढवून पाणी अधिक क्षमतेने आणि लवकरात लवकर सोसायटीतील टाकीत चढवण्यासाठी अवैधरित्या एक मोटारपंप बसवण्यात आला आहे.
हा पाणीपुरवठा सुरू झाल्यानंतर मोटरपंप सुरू करून त्याद्वारे पाणीपुरवठ्यातील पाणी सोसायटीच्या टाकीत चढवण्यात येत होते. नेहमीप्रमाणे मोटारपंप सुरू करण्यासाठी सोसायटीतील वॉचमन कमल साऊद मोटारपंपाची वीज जोडणी करत असताना त्यांना विजेचा जोरदार झटका लागला.
आईसोबत ट्यूशनला निघालेली, मागून टिप्परने फरफटत नेलं; आईच्या डोळ्यासमोर चिमुकलीचा अंत, शहरात हळहळ

विजेच्या धक्क्याने वॉचमनचा मृत्यू झाल्याची घटना सीसीटीव्हीमध्ये कैद

या दुर्घटनेत वॉचमन कमल साउद यांचा जागीच मृत्यू झाला आहे. रविवारी अकरा वाजताच्या सुमारास ही घटना घडली असून सोसायटीच्या निष्काळजीपणामुळे वॉचमन कमल यांचा मृत्यू झाल्याचा आरोप त्यांच्या कुटुंबीयांनी केला आहे. मोटारपंप सुरु करण्यासाठी विज जोडणी करत असताना वॉचमन यांचा विजेचा झटका लागून झालेल्या मृत्यूची घटना सोसायटी परिसरात असलेल्या एका सीसीटीव्ही कॅमेऱ्यात कैद झाली आहे.

पालघर पोलीस ठाण्यात अपघाती मृत्यूची नोंद

दरम्यान, घटनेची माहिती मिळाल्यानंतर पालघर पोलीस घटनास्थळी दाखल झाले आणि मृतदेह ताब्यात घेत शवविच्छेदनासाठी पाठवण्यात आला. घटनास्थळाचा पंचनामा पोलिसांमार्फत करण्यात आला असून याप्रकरणी पालघर पोलीस ठाण्यात अपघाती मृत्यूची नोंद करण्यात आली आहे. याप्रकरणी अधिक तपास पालघर पोलीस करीत आहेत. मात्र या घटनेने, वॉनमनच्या अशाप्रकारे निधनाने परिसरात हळहळ व्यक्त होत आहे. तसंच सोसायट्यांमध्येही विजेच्या उपकरणांबाबत योग्य ती काळजी घेण्याचं यानिमित्ताने समोर येत आहे.