नंदुरबार पोलीस मुख्यालयाजवळील वसाहतीत चोरट्यांनी दि.२९ रोजीच्या रात्री चार घरे फोडत सुमारे चार लाख २ हजारांचा मुद्देमाल चोरुन नेला होता. याप्रकरणी स्थानिक गुन्हे शाखेमार्फत तपासाला गती देण्यात आली होती. त्यानुसार दि.८ जानेवारी रोजी पोलीस निरीक्षक हेमंत पाटील यांना मिळालेल्या गुप्त माहितीनुसार, सदर गुन्हा मध्यप्रदेश राज्यातील संशयितांनी केल्याचे समजले.

त्यानुसार मध्य प्रदेश येथे रवाना करण्यात आलेल्या पथकाने सबत प्यारसिंग अनारे (वय २९ वर्षे) रा.थिलवाणी, पोस्टे पिंप्रापाणी, ता.कुक्षी जि.धार, मध्यप्रदेश, मनसिंग सदनसिंग चव्हाण (वय २१ वर्षे ) रा.कुतेडी, पोस्टे नरवाली,ता.कुक्षी, जि.धार, मध्यप्रदेश यांना ताब्यात घेण्यात आले.ताब्यात घेण्यात आलेल्या दोघांनी त्यांचा साथीदार फुलसिंग हरसिंग मंडलोई, रा. सिंगाचोरी (ता.कुक्षी, जि.धार,मध्यप्रदेश) हा चोरीचा मुद्देमाल विक्री करण्यासाठी कुक्षी येथे येणार असल्याचे समजले.

पोलिसांनी सापळा रचून फुलसिंग हरसिंग मंडलोई (वय २३) याच्यासह राजललीत सोनी (वय ३० वर्षे ) रा.जोबट,जि.अलिराजपुर, मध्यप्रदेश व हार्दिक कुमार जसवंत भाई सोनी (वय ३२ वर्षे ) रा.गरबडा, ता.गरबडा, जि.दाहोद, गुजरात यांना ताब्यात घेतले. संशयितांनी नंदुरबार शहर, शहादा, तळोदा येथे चोरी केल्याचे सांगितले.
संशयितांकडून २३ लाख ३४ हजार ३१० रुपयांचे दागिने व रोकड हस्तगत करण्यात आली.

संशयितांनी महाराष्ट्र, आंध्रप्रदेश राज्यात सुध्दा घरफोडी केल्याची शक्यता आहे. सदर गुन्हयाचा पुढील तपास नंदुरबार शहर पोलीस ठाण्याचे पोलीस निरीक्षक अमित मनेळ करीत आहेत. सदरची कामगिरी पोलीस अधिक्षक श्रवण दत्त एस, अपर पोलीस अधीक्षक आशित कांबळे, उपविभागीय पोलीस अधिकारी संजय महाजन यांचे मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, पोहेकॉ.मुकेश तावडे, राकेश मोरे, विशाल नागरे, बापू बागुल, पोना.मोहन ढमढेरे, पोशि.अभय राजपुत, विजय धिवरे यांच्या पथकाने केली आहे.