सलून आणि ब्युटी पार्लर संचालकांनी त्यांच्या विविध सेवांसाठी आकारण्यात येणाऱ्या दरांमध्ये वाढ केली आहे. महाराष्ट्र राज्य सलून आणि ब्युटी पार्लर असोसिएशनने हा निर्णय घेतला आहे. त्यानुसार, नवे दरफलक आता लागू करण्यात आले आहे. व्यावसायिकांच्या म्हणण्यानुसार, वाढत्या महागाईमुळे सलूनमध्ये लागणाऱ्या उत्पादनांच्या किंमती वाढल्या आहेत. तसेच, वीज भाडे आणि कर्मचाऱ्यांचा पगार यामुळेही खर्चात लक्षणीय वाढ झाली आहे. त्यामुळे सेवांच्या दरवाढीचा निर्णय घेणे आवश्यक झाले आहे. व्यावसायिक त्यांची अडचण मांडत असताना ग्राहकराजाही हवालदिल झाल्याचे चित्र आहे. सध्या दाढी ठेवण्याचे, तिला नियमित ट्रिम करण्याची फॅशन आहे. अशात आठवड्यातून एकदा आणि महिन्यातून चारदा सलूनमध्ये जाणाऱ्यांची दरवाढीने पंचाईत केली आहे.

जुन्या दरानुसार, पुरुषांच्या हेअरकटसाठी ८० ते १०० रुपये आकारण्यात येतात. दाढीसाठी सध्या ७० ते १०० रुपये, महिलांच्या हेअरकट आणि फेशियल, हेअर कलरिंगसारख्या सौंदर्यसेवांच्या किमती सध्या २ हजार ते ५ हजार रुपयांच्या घरात आहेत. या सर्वांच्या दरांमध्ये वाढ झाली आहे. गिऱ्हाइकी नको तुटायला नाभिकांच्या राज्यस्तरीय संघटनेने दरवाढीचा निर्णय घेतला आहे. त्यानुसार, नवे दरफलक पाळण्यात येत आहे. तरी काहींनी मात्र गिऱ्हाइकी तुटू नये, वाढलेल्या दरांमुळे ग्राहक नाराज होऊ नयेत म्हणून जुन्या दरांमध्ये सेवा देणे सुरू ठेवले आहे. तर काहींनी मात्र आकर्षक सवलती जाहीर करून ग्राहकराजाचे समाधान जपण्याचा प्रयत्न केला आहे.

■ हेअर कट : १८० रुपये
■ शेव्हिंग : १२० रुपये
■ फेस मसाज : २०० रुपये
■ हेड मसाज : १८० रुपये
■ हेअर वॉश : १२० रुपये
■ हेअर स्पा : ६०० रुपये
■ फेस ब्लिचिंग : ६०० रुपये
■ फेशियल : ७०० रुपये
■ हेअर कट आणि शेव्हिंग (होम सर्व्हिस): ५०० रुपये