अर्थात कबड्डी स्पर्धेच्या उद्घाटन सोहळ्याच्या व्यासपीठावरील बैठक व्यवस्था काही अंतरावर होती. खासदार सुप्रिया सुळे आणि सुनेत्रा पवार राज्यस्तरीय कबड्डी स्पर्धेच्या निमित्ताने एकत्र आल्या. मात्र मध्यभागी सगळे मंत्री आणि बाजूला दोन्ही खासदार अशी त्यांची आसनाची व्यवस्था करण्यात आली होती.

दुसरीकडे खासदार सुप्रिया सुळे यांनी मात्र कबड्डी स्पर्धेच्या उद्घाटनाअगोदर एक तास या मैदानावर येऊन मैदानाची पाहणी केली. तसेच या ठिकाणी असणाऱ्या खेळाडूंची देखील भेट घेतली. त्यानंतर जेव्हा सर्व मंत्री आले त्यानंतर त्यांची असन व्यवस्था करण्यात आली होती. त्यामध्ये सुप्रिया सुळे व्यासपीठाच्या उजव्या बाजूला तर सुनेत्रा पवार या व्यासपीठाच्या डाव्या बाजूला होत्या. दोघींच्या मध्ये कृषी मंत्री माणिकराव कोकाटे, क्रीडामंत्री दत्तात्रय भरणे, उपमुख्यमंत्री अजित पवार व मंत्री पंकजा मुंडे यांची आसन व्यवस्था होती.

दरम्यान पंकजा मुंडे व्यासपीठावर येताच सुप्रिया सुळे यांनी त्यांची गळाभेट घेतली व दोघींमध्ये बराच वेळ संवाद सुरू राहिला.

१६ ते २० जानेवारी दरम्यान बारामतीतील अग्रिकल्चर डेव्हलपमेंट ट्रस्टच्या कृषी विज्ञान केंद्रा मध्ये कृषी या शेतीविषयक प्रदर्शनाचे आयोजन करण्यात आले आहे. याचे उद्घाटन माजी केंद्रीय कृषिमंत्री शरद पवार, उपमुख्यमंत्री अजित पवार, कृषिमंत्री माणिकराव कोकाटे, पशुसंवर्धन मंत्री पंकजा मुंडे, मंत्री दत्तात्रय भरणे यांच्या उपस्थितीत पार पडणार आहे. या निमित्ताने बारामतीत दोन मार्च नंतर पहिल्यांदाच शरद पवार आणि अजित पवार एकत्र येणार आहेत. त्यामुळे या सोहळ्याकडे साऱ्यांच्या नजरा लागल्या आहेत.