पोलीस २२ दिवसांमध्ये वाल्मिक कराडला पकडू शकले नाहीत हे त्यांचं अपयश आहे. मोठ्या आकाला वाचवण्यासाठी याचा एन्काऊंटर करू नका बाबा. हा बिचारा म्हणणार नाही, पण मोठ्या आकापर्यंत जाण्यासाठी याचा वापर होईल तर हा पुरावा नष्ट होण्याची शक्यता आहे. मला विश्वसनीय माहिती जवळच्या उच्चपदस्थ अधिकाऱ्याने दिली. या प्रकरणामध्ये काहीही होऊ शकतं अशी शक्यता असल्याचं विजय वडेट्टीवार यांनी म्हटलं आहे.

अनेक पोलीस अधीक्षक आणि जिल्हाधिकाऱ्यांचा जो अनुभव आहे, बीडमध्ये नेहमी मर्जीतला माणूस असतो. यापूर्वीचा इतिहास असा आहे की कराडलाच बाप माणून पोलीस वागत होते. पोलिसांची प्रतिमा मलिन होताना दिसत आहे. जनतेमध्ये चर्चा आहे त्याकडे लक्ष दिलं नाही तर पोलिस विभागाचं वाटोळ झाल्याशिवाय राहणार नाही. एसआयटी तपास भरकटवण्यासाठी तर केली नाही ना? आरोपीवर कशा प्रकारे चार्जशीट आणि कारवाई करतात हे पाहावं लागणार असल्याचं विजय वडेट्टीवार यांनी सांगितलं.

राजन साळवी भाजप प्रवेशावर वडेट्टीवारांची प्रतिक्रिया

काही लोकांना सत्ता जवळची वाटते, सत्तेशिवाय जगू शकत नाही. सत्तेसाठीच जन्माल आलेत असं कुणाच्या डोक्यात असतं,
लढण्याची प्रवृत्ती कमी झाली की माणून सत्तेच्या मार्गाने जात असतो. राजन साळवींची लढण्याची प्रवृत्ती कमी झाल्याने ते पळापळ करत आहेत. ते माजी आमदार आहेत हे चालत असतं. आता भाजपमध्ये किती जागा रिक्त आहेत, किती जणांना सामावून घेणार आहेत. कोंबड्यांचं खुराडं झाल्यासारखं होऊ नये. कारण जास्त कोंबड्या झाल्या की खुराड्यात घालतात, त्यांना कोंबू नये म्हणजे झालं, असं विजय वडेट्टीवार म्हणाले.