कांदिवलीमध्ये सुनेने, आणखी दोन साथीदारांच्या मदतीने सासऱ्यांच्या बँक खात्यातून सुमारे १५ लाख रुपये काढले. समता नगर पोलिसांनी गंडा घालणे आणि फसवणुकीचा गुन्हा आरोपी सून आणि अन्य तिघांविरुद्ध दाखल केला आहे. अर्शद पठाण, टिंकू गुप्ता आणि पुष्पा बिंद अशी तिन्ही आरोपींची नावे असल्याचे पोलिसांनी सांगितले.

असे आहे संपूर्ण प्रकरण आहे

मिळालेल्या माहितीनुसार, ६९ वर्षीय भारत भूषण केवट आपल्या कुटुंबासोबत कांदिवली येथे राहतात. ते मुंबई महानगरपालिकेच्या शाळेत शिक्षक होते आणि २०१३ मध्ये सेवानिवृत्त झाले होते. निवृत्तीनंतर मिळालेल्या ५ लाख ९ हजार रुपयांची त्यांनी एफडी केली होती. त्यांच्या डायरीत त्यांनी एटीएमचा पासवर्ड लिहिला होता. मार्चमध्ये कांदिवलीतील ठाकूर कॉम्प्लेक्समध्ये पुष्पा आणि अर्शद यांनी कोणत्यातरी बहाण्याने केवट यांची भेट घेतल्याचा आरोप आहे. त्याचवेळी सुनेने सासऱ्यांकडे डायरीसह त्यांचा मोबाईल मागितला.

सुनेवर विश्वास ठेवणं पडलं महागात

सुनेवर विश्वास ठेवून सासऱ्यांनी तिला फोन आणि डायरी दिली. घरी आल्यावर त्यांना त्यांच्या बँकेचे एटीएम गायब असल्याचे दिसून आले. बँकेत एफडीबाबत चौकशी केली असता बॅंकेतील कर्मचाऱ्यांनी एफडीच्या रकमेसोबतच खात्यातून १० लाख ५९ हजार रुपये काढण्यात आल्याचे सांगितले. त्यानंतर केवट यांनी नॉर्थ रीजन सायबर पोलिस स्टेशन आणि समतानगर पोलिस ठाण्यात अज्ञात लोकांविरुद्ध तक्रार दाखल केली.

आरोपींचा पर्दाफाश

सदर प्रकरणाचा तपास सायबर पोलीस करत होते . तपासादरम्यान, ही रक्कम टिंकू गुप्ता आणि अर्शद पठाण यांच्या बँक खात्यात प्रथमतः ट्रान्सफर झाल्याचे पोलिसांना आढळून आले. नंतर त्यांनी ही रक्कम केवट यांची सून पुष्पा बिंद हिच्या खात्यात वर्ग केली. त्यामुळे पोलीस आता सर्व आरोपींची चौकशी करत या फसवणूक प्रकरणाचे गूढ उकलण्याचा प्रयत्न करत आहेत.