शुक्रवारी सकाळी नऊच्या सुमारास सोनेगाव तालाव रोडवर हा अपघात झाला. भरधाव वेगात आलेल्या इंडिगो कारला ओव्हरटेक करण्याच्या प्रयत्नात ही कार तलावाच्या रेलिंगला धडकली आणि रेलिंग तोडून तलावात घुसली. मात्र, तेथे पायऱ्या असल्याने गाडी रेलिंगजवळ येताच पायऱ्यांवर अडकली. या अपघातात कारमध्ये चार ते पाच जण होते. हे सर्व लोक सोमलवाडा परिसरातील असल्याचे सांगण्यात येत आहे, या अपघातानंतर कार मालकाने पोलिसांना या घटनेची माहिती दिली.

या अपघातात गंभीर जखमी झालेल्या तरुणाला तातडीने खासगी रुग्णालयात उपचारासाठी दाखल करण्यात आले असून, त्याच्यावर उपचार सुरू आहे. पोलिसांनी घटनास्थळ गाठून गुन्हा दाखल केला असून पुढील तपास सुरू आहे. मात्र, अपघाताच्या वेळी कार चालक मद्यधुंद होता का, हे वैद्यकीय तपासणीनंतरच समोर येणार आहे. या अपघातात कार चालक किरकोळ जखमी झाला आहे. सुदैवाने पायऱ्यांवर थांबल्याने मोठी दुर्घटना टळली, अन्यथा तलावाच्या पाण्यात बुडून हा अपघात आणखी भीषण होऊ शकला असता. याप्रकरणी सोनेगाव पोलीस आता पुढील तपास करत आहे.