कैलास फड याचा हा व्हिडिओ असून शस्त्रपूजा केल्यानंतर हवेत गोळीबार करण्यात आला होता. हा व्हिडिओ जुना असला तरी आता सोशल मीडियाच्या माध्यमातून व्हायरल होत आहे. याच आधारावर पोलीस अधीक्षक यांच्या आदेशानुसार परळी शहर पोलीस ठाण्यात कैलास फड याच्याविरोधात गुन्हा दाखल करण्यात आला आहे.

शरद पवार गटाचे नेते माधव जाधव यांना विधानसभा निवडणुकीच्या मतदानादरम्यान याच कैलास फड याने मारहाण केल्याचे समोर आले होते. त्यामुळे आता त्याच्या अडचणी वाढण्याची शक्यता आहे. तर मंत्री धनंजय मुंडे हे देखील या भोवऱ्यात सापडण्याची शक्यता आहे.

दरम्यान बीडमधील संतोष देशमुखांच्या हत्येमुळे अवघा महाराष्ट्र हादरला आहे. या प्रकरणामुळे बीडमधील कायदा, सुव्यवस्थेवर प्रश्न उपस्थित केले जात आहेत. या प्रकरणाचा मास्टर माईंड म्हणून वाल्मिक कराड आरोपाच्या पिंजऱ्यात उभे केले जात आहे. तर कराड हा मंत्री धनंजय मुंडे यांचा निकटवर्तीय मानला जातो. यामुळे राजकीय वर्तुळात विविध चर्चा रंगल्या आहेत. तर अंजली दमानिया मंगळवारी दुपारी एक ट्विट करत बीडमधील शस्त्रधारकांची यादीच समोर आणली होती. ‘बीडमध्ये पिस्तुलांचं थैमान? १२२२ शस्त्र परवानाधारक? इतक्या प्रचंड प्रमाणात शस्त्र परवाने का देण्यात आले? परभणीत ३२ आहेत तर अमरावती ग्रामीणमध्ये २४३ शस्त्र परवाने आहेत. मग बीडमध्ये इतक्या मोठ्या प्रमाणावर का व कोणाच्या वरदहस्ताने? १२२२ अधिकृत शस्त्र परवाने मग अनधिकृत किती असतील?,’ अशी प्रश्नांची सरबत्तीच दमानियांनी ट्विटच्या माध्यमातून केली होती. त्यानंतर काहीच तासात केलेले अंजली दमानियांचे दुसरे ट्विट देखील चर्चेचा विषय ठरत आहे.