एकनाथ शिंदे म्हणाले, गेले आठ दिवस सुरु असलेल्या हिवाळी अधिवेशनात आम्ही चांगले निर्णय घेतले. खरं तर आमचं सरकार नव्याने स्थापन झालं नाही तर आमची टीम तीच आहे आणि आता फक्त मॅच नवी आहे. देवेंद्र फडणवीस यांच्या नेतृत्वात महायुती सरकारचं कामकाज सुरु झालं आहे. अधिवेशनाचा वेळ कमी असला तरी सर्व कामकाज पूर्ण झालं. अधिवेशनात पुरवणी मागण्या देखील मान्य झाल्या आहेत. तर योजनांसाठी मोठी आर्थिक तरतूद देखील करण्यात आली आहे. तसेच आमच्या सरकारच्या सर्व योजना सुरु राहतील असेही शिंदेंनी नमूद केले.

दरम्यान एकनाथ शिंदेंनी अप्रत्यक्षपणे उद्धव ठाकरेंवर निशाणा साधला. ‘काही लोक म्हणाले, आमचे मंत्री अधिवेशनात प्रश्नांची उत्तरं देत नाहीत. तर काहीजण आले आणि अधिवेशन विनोदी असल्याची टीका करून गेले. मात्र, काहींनी मुख्यमंत्रीपदाचा राजीनामा देताना आमदारकीचा राजीनामा देणार असल्याचे म्हटले होते. पण आता ते आमदारकी वाचवण्यासाठी पर्यटक म्हणून विधानभवनात येऊन गेले.’ असा खोचक टोला शिंदेंनी लगावला. तर शिंदेंनी पुढे विरोधकांनाही फटकारले आहे. ‘विरोधकांनी सभागृहात प्रश्न न मांडता फक्त माध्यमांसमोर आणि सभागृहाच्या पायऱ्यांवर मांडले. नव्या सरकारला आम्ही गती देण्याचा प्रयत्न करत आहोत. महायुती सरकारची जी गती होती, ती आता अधिक वेगवान झाली आहे’ असेही शिंदे म्हणाले.