Kalyan Marathi People Abuse Case Update : कल्याण पश्चिमेतील अजमेरा हाईट्स या हायप्रोफाईल सोसायटीमध्ये मराठी कुटुंबाला मारहाण केल्याप्रकरणी मोठी बातमी समोर आली आहे. याप्रकरणी आतापर्यंत सहा आरोपींना अटक करण्यात आली होती. त्यांना न्यायालयाकडून सहा दिवसांची पोलीस कोठडी सुनावण्यात आली
गुरुवारी हा मारहाणीचा प्रकार समोर आला होता. ज्यामध्ये अखिलेश शुक्ला याने गुंड बोलावून मराठी कुटुंबाला जबर मारहाण केली. यानंतर तो बेपत्ता झाला होता तर त्याची पत्नीही बेपत्ता होती. यानंतर शुक्लाने शुक्रवारी दुपारी स्वत:चा एक व्हिडीओही बनवला आणि पोस्ट केला होता. ज्यामध्ये त्याने ‘आमच्या जुन्या शेजारच्या वादाला भाषेचा मुद्दा बनवण्यात आला’ असा आरोप केला होता. त्यानंतर काहीच तासांत त्याला पोलिसांकडून अटक करण्यात आली आणि सोबतच पत्नी गीता शुक्ला यांच्यासह सुमित जाधव, दर्शन बोराडे, पार्थ जाधव आणि विवेक जाधव या अन्य सहा आरोपींनाही बेड्या ठोकल्या आहेत. दरम्यान या सहा जणांना शनिवारी न्यायालयात हजर केले असता न्यायालयाने सहा दिवसांची पोलीस कोठडी सुनावली आहे.
कल्याणमध्ये मराठी भाषिकांना मारहाणीचे प्रकरण, आरोपीने अखेर दिले स्पष्टीकरण; म्हणाला, ‘माझ्या बायकोला शिवीगाळ…’
नेमकं प्रकरण काय?
कल्याण पश्चिमेच्या योगिधाम परिसरातील अजमेरा हाईट्स या हायप्रोफाईल सोसायटीमध्ये अखिलेश शुक्ला नावाच्या व्यक्तीने गुंड जमवून आपलेच शेजारी असणाऱ्या मराठी कुटुंबाला बेदम मारहाण केली. धूप आणि अगरबत्ती लावण्याच्या कारणावरुन या वादाची ठिणगी पडली होती. ज्यामध्ये अखिलेश शुक्ला यांनी ‘मी मंत्रालयात कामाला आहे, तु मला मराठीचे सांगू नकोस तुझ्यासारखे ५६ मराठी लोक माझ्यासमोर झाडू मारतात. एक मिनिट में चिफ मिनिस्टर के ऑफिस से फोन करूंगा तो तुम्हारा पुरा मराठीपण निकल जायेगा.’ असे म्हणत दमदाटी केली होती आणि नंतर गुंड बोलवून मराठी लोकांना लोखंडी रॉड, पाईप व काठ्या तसेच लाकडी पट्टयाने मारहाण देखील केली. या मारहाणीचा व्हिडीओ सोशल मीडियावर व्हायरल झाला. यानंतर हे प्रकरण चांगलंच तापलं आहे. तर याचे पडसाद विधानसभेतही उमटले आहेत.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा